Акмал Шораҳмедов: "Натижадан қониқдим, лекин ўйиндан эмас"

- Ўйин ҳақида фикрингиз?

- Бу ўйин ҳар иккала жамоа учун жуда муҳим эди. "Хоразм" учун ҳам охирги имконият эканлигини билардик. Шу боис баҳс ўзига яраша мураккаб кечди. Ярим ҳимояда муаммоларимиз кўплиги боис иккинчи таймда қийинчиликка дуч келдик. Ўзим камдан кам ўйиндан қониқаман, гарчи ғалаба қозонган бўлсак-да, ҳали қиладиган ишимиз кўп. Суперлигада қолиш учун, қолаверса Осиё чемпионлар лигасида ютиш учун кўп ишлашимизга тўғри келади. Янада яхши ўйин кўрсатишимиз шарт. Бу ҳақда ўйиндан кейин кийим алмаштириш хонасида футболчиларга ҳам айтдим.

- Иккинчи бўлимда жамоангиз эрта ҳимояга ўтиб олди. Шундай бўлдики, Ислом Маматказин майдонга тушгач, жамоа 5 киши бўлиб ҳимояланди.

- Тўғриси, олдинда ўйинимизни кучайтирадиган бошқа ҳужумчи йўқ. Ёшлар бор, лекин менинг фикримча, улар айни пайтда бизга ёрдам бера олмайди. Суперлига ўз номи билан кучли мусобақа, бу ерда бақувват футболчилар кўп. Шунинг ёш футболчини майдонга туширгандан кўра, бешта ҳимоячи билан ўйнаганимиз афзал деб ўйладим. Тўғриси, охирги дақиқаларда фақат натижа учун ўйнадик.

- Бектемир Абдуманнонов вингер ҳисобланади. Лекин бугун марказда ҳаракат қилди. Бу нима билан боғлиқ?

- Ярим мавсумдан бери шу ерда ишлаб келаётган бўлсам, Бектемирнинг машғулотдаги ҳаракатларини кўриб ўртада яхшироқ ўйнайди деб юрардим. Бу ҳақда унинг ўзидан ҳам сўраганман. Бектемир менга "Олимпик"да ўртада тўп тепганини айтди. Абдукарим Тоиров тўртинчи сариқ карточкасини олганидан кейин бу ўйинда иштирок эта олмасди. Шу боис охирги икки кун Бектемирни шу чизиққа тайёрладик. Бизга майдон марказида тезкор, креатив футболчи ниҳоятда зарур. 

- 26 ноябрь куни "Андижон"ни жуда муҳим баҳс кутиб турибди. Жамоа ўз майдонида Туркманистоннинг "Арқадағ" клубини қабул қилади. Яна дуранг қайд этиладиган бўлса, жамоа гуруҳда қолиб кетиши мумкин.

- Буни жуда яхши биламиз. Бугун таваккал қилиб уч нафар ҳужумчи билан ўйинни бошладик. Лекин бу "Арқадағ" билан ҳам шундай ўйин намойиш этамиз дегани эмас. Биз бу жамоага қарши бошқа тактикани ўйлаб қўйганмиз. "Арқадағ" ўйин томонлама "Хоразм"дан кучли эмас. "Хоразм"да техник кучли футболчилар кўпроқ, лекин "Арқадағ"да жисмонан бақувват ўйинчилар кўп.

- Бугун "Андижон" сафида Аббос Абдуғаффоров дебют учрашувини ўтказди. У ҳақда фикрингиз?

- Таянч ярим ҳимоясида футболчиларимиз деярли йўқ. Аббосни U-21даги ўйинларини кўриб асосий таркибга жалб қилдик ва унга ишонч билдирдик. Мен ўзимга ёққан футболчини майдонга туширишдан умуман қўрқмайман.