Акбар Усмонов: "Футзалда ўйинлар мухлисларга қулай вақтда бўлиши муҳим, гуруҳимизда тенг кучли жамоалар ўрин олган"

ЎзСҚБ жамоаси илк бор профессионал миқёсда катта турнирда юришини бошлайди. Таркибига номдор футзалчиларни жалб қилган жамоа "D" гуруҳида "Локомотив", "Динамо", "Насаф" билан тўқнаш келади. Ушбу учрашувлар олдидан янги мавсумни ЎзСҚБ таркибида ўтказадиган Акбар Усмоновга юзландик. 

- Футзал бўйича Ўзбекистон Кубогига тайёргарлик қандай кетмоқда? Янги жамоа билан Кубок баҳсларидан нималарни кутяпсиз?

- Айни пайтда машғулотларни қизғин равишда олиб бормоқдамиз. Ўйлайманки, Ўзбекистон Кубоги қизиқарли кечади. Айниқса, бизнинг гуруҳни айтган бўлардим. Сабаби гуруҳимизда тенг кучли жамоалар жой олган. 

- Янги форматнинг қандай афзалликлари бор?

- Кубокнинг янгича форматда ўтиши менга ёқди. Ўйинларнинг кўплиги ва мамлакатимизнинг турли манзилларида ўтиши билан аввалгиларидан ажралиб турибди. Бу мухлисларни ҳам қувонтиради. 

- ЎзСҚБ таркибида яна кимларни кўришимиз мумкин?

- Жамоамизга хориждан ўйинчилар келиши кутилмоқда. Бунинг устида иш олиб боришяпти. Жамоада ким ўйнашидан қатъи назар соғлом рақобат ва Ўзбекистон футзалининг ўсиши тарафдоримиз. 

- Ўйинларнинг вақти аввалгиларидан фарқ қилмоқда. Бу эса мухлисларга қулайлик туғдириши шубҳасиз. Футзалчи сифатида бунга муносабатингиз қандай? 

- Ўйинларнинг эрта бўлишига қаршиман албатта. Бу борада сезиларли ўсишга эришилгани хурсанд қилди. Учрашувларнинг мухлисларга қулай вақтда ўтиши муҳим. Томошабинлар спортнинг ярим бўлаги.