"Аждарлар" ОЧЛда парвозга тайёрми? Осиё ўйинларига кимлар чақирилди? Рўзиқул Бердиев билан интервью

Қарши клуби бугун Анталияга етиб келди ва ҳозирликни бошлади. Тайёргарлик жараёнлари ҳақида жамоа устози Рўзиқул Бердиев сайтимизга фикрларини билдирди.

- ФИФА кунлари доирасида юзага келган танаффусда ОЧЛга тайёргарлик жараёни қандай кетяпти? Анталиядаги йиғин ҳақида нима дея оласиз?

- "Турон" билан учрашувдан сўнг йигитларга 5 кун дам бердик. 7 сентябрь куни йиғилиб, 12 сентябргача шуғулландик ва ОКМК билан ўртоқлик учрашувида майдонга тушдик. 

-  Таркибдаги барча футболчилар шай ҳолатдами? Чавес ва Жигаурида жамоага мослашиш жараёни ортда қолдими?

- Барча футболчилар тайёр. Фақат терма жамоалардаги футболчиларимиз йиғинларни энди якунлашди. Улар бугун ихтиёримизга келиб қўшилади. 3 кун биргаликда машғулот ўтказиб, ОЧЛ баҳсига йўл оламиз. Туркия орқали Иорданияга етиб бориш биз учун энг маъқул вариант бўлди, дея оламан. Туркиядан Иорданияга парвоз 1,5 соатни ташкил қилади. 

- Осиё ўйинларига "Насаф"дан Алибек Давронов ва Абдувоҳид Неъматов чақирилган. Улар "Насаф" учун муҳим футболчилар ҳисобланади. ОЧЛ учрашуви олдидан бу катта йўқотиш эмасми?

- Чавес ва Давронов биз билан бирга бўлмайди. Аргентиналик ҳужумчи жароҳатини тўлиқ тикламади ва Тошкентда қолди. Давронов Осиё ўйинларига боради. Биз Тимур Кападзедан Абдувоҳидни қолдиришни илтимос қилдик. Биз биргина Умид Эргашев билан қолиб, таваккал қилишни истамадик. 

- Анталиядаги қисқа йиғинда назорат ўйини ҳам ўтказиш режада борми?

- Анталияда биз фақат машғулот олиб борамиз. Ўйин ўтказиш муҳим эмас. Терма жамоа футболчилари иқлимга мослашиб олишлари учун ҳам бу нарсани шарт, деб ҳисобламадик. 

- Октябрь ойида футболчилар ҳар 3-4 кунда ўйин ўтказишади. Улар мавсум охиридаги юкламалар ва босимга тайёрми?

- Ўйлайманки, жисмоний тайёргарлик масаласида муаммо бўлмайди. Мавсумни охиридаги тиғиз тақвимдан муваффақиятли ўтиб оламиз. Таркибда етарлича футболчилар бор. Фақат олдимиздаги ўйинларга эътибор қаратилади. 

Абдулазиз Искандаров суҳбатлашди