Ўйиндан сўнг ғузорликларнинг тайёргарлик жараёнлари ҳақида жамоа бош мураббийи Асрор Алиқуловга юзландик.
- Про лигага тайёргарлик қандай кетяпти?
- Бу йиғинни Тошкент шаҳрида бошладик. Ундан аввал икки босқичли тайёргарликни Ғузорда олиб бордик. Бу биринчи назорат учрашувимиз эди, олдинда яна бир нечта баҳсларда қатнашамиз. Бунинг учун раҳбарият ва ҳомийларимиз томонидан барча шароитлар яратиб берилмоқда. Мақсадимиз "Шўртан"ни Суперлигага қайтариш. Мухлислар элитага қайтишимизни кутяпти. Бу масъулиятни ҳис қилиб турибмиз. Бизни оғир мавсум кутмоқда.
- Янги футболчилар ва легионерлардан қанчалик кўнглингиз тўляпти?
- Кўриб турибсиз, маҳаллий футболчиларни ҳам Про лигага жалб қилиш осон эмас, чунки талаблар жуда баланд. Биз легионерларга таянишга мажбурмиз. Легионернинг ўзини кўрсатиши 50/50 бўлади, бу ўзига ҳос лоторея. Жамоамизга таклиф қилган легионерларимиз ўзини оқлайди деган умиддамиз. Фақатгина қисқа роликларга эмас, барча жиҳатларни таҳлил қилиб кўряпмиз. Адашмасак хурсанд бўлардик, легионер масаласи оғриқли мавзу. Улар мавсумга бизга ёрдам беришига ишонамиз.
- Жамоани Суперлигага олиб чиқиш миссияси сиз учун бегона эмас. Бу йилги Про лигада жамланаётган жамоалардан келиб чиқсак, вазифа қанчалик қийинлашади?
- "Каттақўрғон", "Яйпан", "Металлург" қолаверса университет жамоалари билан қизиқарли мавсум бўлади. "Арал"ни ҳам эсдан чиқазмаслик керак. Битта эмас бир нечта жамоалар олдига юқори вазифа қўйган. Улар ҳам таркибини кучайтирмоқда. "Металлург"да кўп футболчиларни кўряпмиз. Бизнинг мақсадимиз бор ва бу йўлда таркиб йиғяпмиз. Қолган жамоалар ҳам бизга яхши бош оғриқ бўлади. Ҳар йилгиданда қийин мавсумни тахмин қилиш мумкин.
Абдулазиз Искандаров суҳбатлашди
