ЖЧ-2014. Мундиал иштирокчилари - Франция

Франция терма жамоаси ҳақида сўз кетганда, аввало Платини, Зидан, Анри каби футболчилар кўз олдимизга гавдаланади. Айнан ушбу футболчилар терма жамоа сафида ўйнаган пайтида Франция ўзининг энг юқори натижаларини кўрсата олган. Ҳар қандай рақибни доғда волдириш улар учун оддий ишдек бўларди. Ҳозирда Франция таркибидаги ёрқин юлдуз бу Франк Рибери. Аммо яқиндагина ушбу футбол афсунгари жароҳати сабаб мундиалда иштирок эта олмаслиги ойдинлашди. Бу Дидье Дешам жамоаси учун жуда катта йўқотиш. Европанинг 2012/2013 йилдаги тенгсиз футболчисисиз ўтадиган мундиал бирозгина бўлсада ўз гўзаллигини йўқотиши аниқ. Бу кўпроқ франциялик футбол мухлислари учун сезилиши аниқ.

Рибери мундиал олдидан жамоа қароргоҳини тарк этди

Умуман олганда, французлар мундиалда ҳар қандай таркиб ва қайси даврда бўлишидан қатъий назар, чемпионат ғолиблигига асосий даъгарлардан бири саналишган. Жамоа учун Жаҳон чемпионатларидаги илк муваффақиятли иштирок бу 1958 йилга келиб содир бўлган. Жюстом Фонтен ва Раймон Копа етакчилиги остида қўлга киритилган бронза медаллари Франциянинг мундиалдаги илк соврини ҳисобланади.
Шундан кейин Франция 1980 йилларгача халқаро мусобақаларда ўзларидан кутилган натижаларни қайд эта олишмади.
Терма жамоа сафида Мишель Платини, Жан Тиган, Ален Жирес ва Луис Фернандес каби футболчилари тўп тепа бошлашганидан сўнг, Франция ўйинларида яна жозиба қайтганди. Ушбу санаб ўтилган футбочилар билан биргаликда, Франция 1984 йили ўтказилган Европа чемпионатида зафар қучади. Икки йил ўтиб эса, Жаҳон чемпионатида яна бронза медалларини қўлга киритишади.
Орадан 14 йил ўтганидан сўнг, жамоа бошқарувига Эме Жаке келади. Ушбу мутахассисқўли остида жамоа 1998 йили ўз уйларида ўтказилган мундиалда бош совринга эга чиқишади. Ўшанда Зайниддин Зиданнинг такрорланмас ўйинлари, якунда Францияга Жаҳон тожини олиб беради. Ўшанда Франция финалда Бразилияни йирик ҳисобда тор-мор этади. Зидан иккита ва Пети бир тўп соҳибига айланишган эди.
Ушбу ғалабадан кейин жамоа икки йил ўтиб, Европада ҳам тенгсиз бўлади. Бу сафар финалда Италия мағлуб этилади ва Франция кетма-кет Жаҳон ва Европи чемпиони номига сазовор бўлади. Айнан шу давр Франциянинг "олтин авлоди" бўлган. Фабиен Бартез, Марсел Десайи, Лилиан Тюрам, Эмануэль Пети, Жоркаэфф, Лизаразю, Дюгарри, Трезеге, Анри, Зидан, Блан, Дешам, Виейра, Карамбё каби футболчилар Францияни ушбу ўлкан ғалабага етаклай олишган эди. Бу футболчилар Франция тарихидан муқим жой олишади.

Франция - 1998. Жаҳон чемпионлари...

Шундан кейин жамоа 2002 йилги Жаҳон чемпионатида иштирок этади ва ўз юришларини гуруҳ босқичидаёқ тўхтатишга мажбур бўлади. Бу мамлакатда катта эътирозларни келтириб чиқаради.
Кейинги Европа чемпионатида эса жамоа 2004 йилдаги Европа чемпиони соҳиблари Грецияга ярим финалда имкониятни бой беришади.
Ушбу қийинчиликлардан сўнг, жамоа 2006 йил Германияда ўтказилган Жаҳон чемпионати финалига қадар боради ва ҳал қилувчи баҳсда Зиданнинг ғайри-табиий ҳаракатлари якунда жамоасига қимматга тушади ва Италия 2000 йилги аламли финал учун ўз "ўч"ини олади.
Кейинги мусобоқаларда ҳам Франция на Европа ва на ЖАРда бўлиб ўтган мундиалда ўзларидан кутилган натижана кўрсата олишади. Бу қониқарсиз натижалар ва футболчилар ва мураббий ўртасидаги юзага келган тушунмовчиликлардан сўнг, ниҳоят Франция футбол федератцияси Раймон Доменекни ўз лавозимидан четлатади.
Франция терма жамоаси бош мураббийлигига Лоран Блан таклиф этилади ва унинг биринчи вазифаси этиб, жамоада тартибни ўз ўрнига қўйиш белгиланади. Лоран Блан икки йиллик шартномага имзо чекади ва ўз ишига киришида. Бланнинг биринчи қилган иши бу ички интизомни ўз назоратига олади ва ҳар бир футболчига мамлакат мадҳияси ёд олишлари кераклигини айтади. Лоран Блан жамоани Евро-2012га олиб чиқади ва у ерда улар чорак финал босқичида Испания билан дуч келишади. Айнан Испанияга қарши ўйинда мағлуб бўлишиб, чемпионатни эрта якунлашади. Шундан сўнг, Лоран Блан ҳам ўз лавозимидан кетади. Францияни кейинги мураббийи этиб ўтмишдаги собиқ ярим ҳимоячиси бўлган Дидье Дешам тайинланади.

Франция - 2000. Юлдузли таркибнинг юлдузли онлари...

Ҳозирда Дешам бошчилик қилаётган Франция мундиалга пухта тайёргарлик кўрмоқда. Улар ўрин олган "Е" гуруҳида Дидье Дешам жамоаси фаворит ҳисобланади. Қолган гранд жамоаларни гуруҳига нисбатан, Францияга осонроқ квартет тушди. Швейцария, Эквадор ва Гондурас каби жамоалар Франция учун у қадар жиддий рақиб саналмайди. Франция 14 йиллик катта танаффусдан буён халқаро мусобақаларда соврин юта олмасдан келмоқда. Дидье Дешам ушбу мундиалга Самир Насрини олиб кетмади. Унинг айтишича, Насри ички муҳитни бузиб қўйиши мумкин экан. Франция таркибида ярқ этиб порлаши мумкин бўлган футболчилар етарлича топилади. Масалан, Поль Погба, Кабай, Варан, Дебюши, Оливье Жиру, Бензема каби футболчилардан мураббийнинг умиди катта.

Бу сафарги уриниш улар учун қай тариқа якун топишини эса Бразилиядаги чемпионатдан сўнг билиб оламиз.

Франция терма жамоаси шу кунгача 13 марта мундиалда иштирок этган ва бир бор чемпион номини қўлга киритган. Жами ўтказилган 54 учрашувнинг 25 тасида ғалаба нашидасини суришган бўлса, 11 ўйинда дуранг натижаси қайд этилган ва 18 баҳсда майдондан бошларини эгиб чиқиб кетишган. Тўплар нисбати 96-68.


Франция терма жамоаси ҳақида:

Ташкил топган йил: 1904

Минтақаси: УЕФА

Бош мураббий: Дидье Дешам

Жамоа сардори: Уго Льорис

Энг кўп ўйин ўтказган футболчи: Лилиан Тюрам (142 ўйин)

Энг яхши тўпурар: Тьерри Анри (51 гол)

ФИФА рейтингидаги ўрни: 17

Илк ўйини: Бельгия - Франция 3:3 (1904 йил)

Энг йирик ғалабаси: Франция - Озарбайжон 10:0 (1995 йил)

Энг йирик мағлубияти: Дания - Франция 17:1 (1908 йил)

Эришган ютуқлари:
Жаҳон чемпиони: (1998)
Европа чемпиони: (1984, 2000)
Конфедерациялари кубоги соҳиби: (2001, 2003)
Олимпияда ғолиби: (1984)  

Франция терма жамоасининг мундиалга борадиган таркиби:

Дарвозабонлар - Юго Льорис ("Тоттенхэм", Англия), Стефан Рюффье ("Сент-Этьен"), Микаэль Ландро ("Бастия");

Ҳимоячилар - Матье Дебюши ("Ньюкасл", Англия), Люка Динь ("ПСЖ"), Эвра ("Манчестер Юнайтед", Англия), Бакари Санья, Лоран Косьельни (иккиси – "Арсенал", Англия), Эльяким Мангаля ("Порту", Португалия), Мамаду Сако ("Ливерпуль", Англия), Рафаэль Варан ("Реал", Испания);

Ярим ҳимоячилар - Йоан Кабай ("ПСЖ"), Клеман Гренье ("Лион"), Блез Матюиди ("ПСЖ"), Рио Мавуба ("Лилль"), Поль Погба ("Ювентус", Италия), Мусса Сиссоко ("Ньюкасл", Англия), Матье Вальбуэна ("Олимпик"), Морган Шнайдерлен ("Саутгемптон, Англия")

Ҳужумчилар - Карим Бензема ("Реал", Мадрид, Испания), Оливье Жиру ("Арсенал", Англия), Антуан Гризманн ("Реал Сосьедад", Испания), Лоик Реми ("Ньюкасл", Англия).

Шаҳбоз Беғамов тайёрлади.