Ёшлар терма жамоаси билан мундиалда иштирок этган Хуршид Ғиёсов 25 ёшни қарши олди

“Бунёдкор” академияси тарбияланувчиси ҳисобланган футболчи ўз вақтида Равшан Ҳайдаров мураббийлигидаги ёшлар терма жамоамизнинг асосий футболчиларидан бири бўлганди. 2014 йил Мьянма мезбонлик қилган Осиё чемпионатида терма жамоа билан ярим финалга қадар етиб бориб мундиалга чиқишимизга ўзининг ҳиссасини қўшган. 2015 йил Янги Зеландия яшил майдонларида ташкил этилган кичик жаҳон чемпионатида жамоа таркибидан муқим ўрин эгаллади. Сенегал билан ярим финал чиптаси учун кечадиган учрашувда асосий таркибда майдонга тушди ва рақиб футболчиларига ўз қанотида имконият қолдирмади.

2016 йил кўпроқ ўйин амалиётига эга бўлиш мақсадида Тошкентнинг бошқа бир жамоаси “Обод”да ижара асосида бир мавсум тўлиқ ҳаракат қилди. Кейинги мавсум эса “Бунёдкор”га қайтиб ОЧЛда бир қатор ўйинларда қатнашди. Иқтидорли вингер 2018 йил “қалдирғочлар”нинг ажралмас ўйинчиси сифатида гавдаланди. Миржалол Қосимов шогирдидан унумли фойдалана олди. Ўтган мавсум эса 12та гол билан жамоа тўпурарлар орасида биринчи бўлди ва бронза медалларига эга чиқди.

Натижада хорижлик скаутлар назарига тушган ярим ҳимоячи янги мавсумда Жанубий Кореянинг “Аньянг” клубига йўл олди. Ўйлаймизки, мураббийлари Сергей Лушчан, Миржалол Қосимов, Хикмат Эргашев, Вадим Абрамовларнинг тавсиялари ва ўгитларини эсдан чиқармаган ҳолда хорижда муносиб тўп тепишига ишонамиз.

Жасур Жалолиддинов (“Бунёдкор” жамоаси футболчиси): - Хуршид акамни чин қалбимдан табриклайман. Соғ ва омон бўлиб ҳаётда бундан ҳам катта совринларни ютишларига тилакдошман. Улар билан бир ярим йил бир жамоада ўйнаганимдан хурсандман. Мени доим қўллаб-қувватлаганлар. Майдонда ҳам ўзаро яхши келишиб ҳаракат қиламиз. Кейинги фаолиятларида омад тилайман.

Миржаҳон Мираҳмадов (“Бунёдкор” жамоаси ҳужумчиси): Хуршид акани бугунги туғилган кунлари билан табриклайман. Ўтган мавсум биз билан биргаликда катта ҳажмдаги ишни бажардилар. Кўплаб голлар урдилар, голларга ассистенлик қилдилар. Юқори савиядаги футболчи деб айта оламан. Соғлик саломатлик ва узоқ умр тилайман. Бундай футболчи ҳамма жамоага фойда келтиради.

Сайтимиз номидан Хуршид Ғиёсовга соғлик ва саломатлик, Кореядаги фаолияти давомида омад тилаймиз!

Абдулазиз Искандаров тайёрлади