Ёрқин Назаров: "Таҳлил қилиб кўрсам, жуда кўп ўйинларда ҳакамларнинг хатолари сабаб ютқазиб қўйган эканмиз"

- Ўйин ҳақида

- Рақибни ғалаба билан табриклайман. Ўйинга келсак, ҳаракат қилдик. Ҳамма бор кучини ишлатди. Суперлигада қолиш имкониятини охирги тургача сақлаб қолмоқчи эдик, аммо буни уддалай олмадик. Йигитларга раҳмат.

- Кеча матбуотда "Турон" футболчилар маош олмаётгани ҳақида хабарлар тарқалди. Бу қанчалик асосга эга. Агар рост бўлса, ўйинчиларга мотивация бериш жараёни қандай кечди?

- Тўғри, ҳар қанақасига ҳам мотивация беришга ҳаракат қилмоқдаман. Барибир ҳам маош бу биринчи мотивация ҳисобланади. Вазият шундай бўлиб қолди. Аминманки, бу ҳолат ўз ечимини топади ва барча ўз маошини тўлиқ олади. Бу вақт масаласи. Бугун "Андижон"ни мағлуб қилсак, охирги турда имкониятимиз сақланиб қоларди. Айнан шу нарса мотивация эди. Маошлар билан боғлиқ муаммо бор, аммо йигитлар шу ҳолатда ҳам борларини беришди.

- Хумоюн Муртазоев жамоадан кетдими?

- Унда жароҳат бор. Оёғида гипс бор эди, аммо у ўйнамоқчи бўлди. Ўтган ўйинда Хумоюнни майдонга туширдик, аммо унинг ўйини чиқмади. Бу ўйин режасига Хумоюнни киритмадик. Ҳужумга ёшларни қўйдик. Хуллас, жароҳат сабаб Хумоюн Муртазоев майдонга туширилмади.

- Жамоадаги келажагингиз қандай?

- Бугун бош директоримиз билан шу масала бўйича гаплашмоқчи бўлдик. Мен эса чемпионатни тугатиб олишни илтимос қилдим. Кейин бу масалани бафуржа муҳокама қилиб оламиз.

- Мавсум давомида ҳакамлик ҳақида деярли гапирмадингиз. Балки, бугун гапирарсиз?

- Ҳа, ҳакамларни гапиришни ёмон кўраман, аммо савол берганингиз учун бу мавзуни гапираман. Биринчи даврадан кейин жамоани тўққиз нафар ўйинчи тарк этди, легионерларга жавоб бериб юборилди. Ёш таркиб шакллантирдик. Шу ҳолатда ҳам ҳаракат қилдик. Таҳлил қилиб чиққанимдан сўнг, амин бўлдимки, жуда кўп ўйинларда ҳакамларнинг хатолари сабаб ютқазиб қўйган эканмиз. Деярли ҳар бир ўйинда ё пенальти, ёки қизил карточка олган бўламиз. Ҳакамлар ҳақида ҳеч нарса дегим келмаяпти. Бу иш билан шуғулланувчи махсус ташкилот бор. Ҳакамлар етишмовчилиги борми ёки бошқа сабабми, айнан бизнинг зараримизга жуда кўп хатолар қилинди. Бу баҳона эмас. Майли, ҳакамларга ҳам инсоф берсин. Кейинги йил барчаси яхши бўлиб кетишига умид қиламиз.