Хуршид Ғиёсовнинг онаси: "Ҳар бир она фарзандининг иштирокини кўзида ёш билан томоша қилгани аниқ"

- Фарзандларимиз иштирокидаги барча ўйинларни бутун оила аъзоларимиз биргаликда, юракда ҳаяжон билан томоша қилдик. Уларнинг шу даражаларга эришишлари йўлида тинмай меҳнат қилган мураббийлардан, фарзандларимиз учун чексиз имкониятлар яратган давлатимиздан жуда миннатдормиз. Турмуш ўртоғимнинг футболга бўлган меҳр-муҳаббати ўғлим Хуршидбекка ҳам ўтган. Унинг жаҳон миқёсидаги ўйинларда юртимиз фахри бўлиб иштирок этаётганини кўриш бизга чексиз қувонч бахш этади. Бир нарсани ишонч билан айта оламанки, ҳар бир она фарзандининг иштирокини кўзида ёш билан томоша қилган. Йигитлар борини бериб ҳаракат қилишди, ҳеч афсусланмайман, улар ҳақиқатда кучли эканликларини, юраклари шижоатга лиммо-лим эканлигини ҳар битта ўйинда исботлай олишди. Барчасига бахт, омад, юксак марралар тилаб қоламан.


Гулшан Саъдуллаева ёзиб олди