Худоёрхон Сагдуллаев: "Машъал"да ички муҳит бузилгани учун Суперлигага чиқа олмадик"

Жамоа ярим ҳимоячиси Худоёрхон Сагдуллаев 23та ўйинда майдонга тушди ва 6та гол уришга эришди. Биз футболчи билан ортда қолган мавсум ҳақида суҳбатлашдик.

- Якунланган мавсум ҳақида фикрингиз?
- "Машъал" жамоамиз билан бирга Суперлигага чиқишни мақсад қилгандик. Биринчи даврада яхши ўйнадик, ҳатто пешқадамлик ҳам қилдик. Иккинчи даврада жамоада ўзгаришлар бўлди. Ўйинни кучайтириш учун янги ўйинчилар келди. Лекин менимча бу минусга қараб кетди.

- Кейинги мавсум учун режаларингиз қандай?
- Олдимда Суперлига жамоаларидан таклифлар бор. Лекин "Машъал" билан яна бир йиллик шартномам бор. Ўзим Суперлига клубида ўйнашни ва омадимни синаб кўришни хоҳлардим.

- Нима учун "Машъал"ни легионерлар тарк этди. Бу молиявий муаммолар туфайли бўлдими?
- "Машъал"да ҳар доим молиявий муаммо бўлиб келган. Легионерлар Ўзбекистонга нега келади? Пул ишлаш учун. Уларга вақтида пул берилмаса майдонга тушиб ўйнашни хоҳламайди. Менимча шу боис улар жамоадан кетишди.

- Суперлигани кузатиб бордингизми? "Насаф"га чемпионлик учун нима етишмади деб ўйлайсиз?
- Тажриба етишмади. "Насаф"да ўзим ҳам ўйнаганман, кучли жамоа, ички муҳит аъло даражада, ҳаммани бирдек кўришади. Бош мураббий ким кучли бўса ўшани майдонга туширади. Биринчи ўринда боришнинг ҳам ўзига яраша босими бор. Ўша босимни кўтара олган жамоа якунда чемпион бўлади.

- "Машъал"нинг Суперлигага чиқишига нима етишмади? Нега мавсум охирида жамоадан яхши ўйин кўрмадик?
- Ички муҳит бузилди. Йигитларда иштиёқ йўқолди. Шундай ҳолатлар бўлдики, 3 ойлаб маош олмадик. Суперлигага чиқиш учун молиявий ҳолат яхши ва бир маъромда бўлиши керак.

- "Машъал" билан яна бир йиллик шартномам бор дедингиз. Бир йилдан кейин "Насаф"га қайтасизми ёки бошқа клубга кетасизми?
- Агар "Насаф"дан таклиф тушса албатта Қарши клубига қайтаман. Сабаби "Насаф"дан тепага кўтарилиш осонроқ.

- "Машъал" яна неча йил Про лигада ўйнайди деб ўйлайсиз?
- Менимча 2023 йилда Суперлигага қайтса керак, чунки ўзгаришлар катта.

Абдулла Дониёров суҳбатлашди