Воҳид Холбоев "Нурафшон"га легионер олиб келинмагани сабабини айтди
10 мая 2018 23:39
Новости

Воҳид Холбоев "Нурафшон"га легионер олиб келинмагани сабабини айтди

Ўзбекистон Про-Лигаси 8-тури доирасида "Нурафшон" - "Локомотив-БФК" (5:0) учрашувидан кейин мезбон жамоа устози Воҳид Холбоев ўз фикрларини билдириб ўтди.

"Локомотив-БФК" ёш футболчилардан ташкил топган жамоа. Бизда эса тажрибали футболчилар кўп. Шу боисдан рақибга кўпроқ гол киритдик. Аммо олдинда ўйинлар ҳали етарлича. Собиқ жамоам тез орада ғалабага эришади.
Мурод Ражабов Про-Лига савиясидан юқори футболчи. У, Фарруҳ Шотурсунов, Руслан Вагапов жамоани олдинга тортмоқда. Улар орқали ўйин ташкил қилинмоқда. Ўзим ҳам футбол ўйнаганман ва шу боисдан айта оламанки, юқори савияли футболчида мана шундай давр бўлиши керак. Мурод бир неча йил ҳорижда тўп сурди ва у маҳоратли футболчи бўлиб етишди. Балки у биринчи даврадан кейин Суперлигага кетиши мумкиндир...
Яширмайман, мавсум бошида жамоага Молдавиядан легионер олиб келишни ният қилгандим. 1990 йилда туғилган футболчи ўзбек футболида бемалол ўйнай оларди. Аммо ўша вақтларда "Нурафшон"нинг ташкил этилиши ҳам аниқ бўлмаганди. Бу масала ҳал этилганда эса молдоваликни бошқа жамоа рўйхатдан ўтказиб бўлган экан. Биз қарорни етказишда бироз кечикдик. Агарда у жамоага келганида, йигитлардаги ўсиш янада кучлироқ бўларди.
Ўтган асрнинг охирларида "Дўстлик" жамоаси йўқ бўлиб кетганидан буён футбол баҳсларига бунчалик мухлис тушмаганди. Бугун стадионга ташриф буюриб, бизни қўллаб-қувватлаганларга катта раҳмат айтаман. Уларнинг қўллаб-қувватлаши туфайли бугун ғалабага эришдик", - деди Холбоев.