"Водий футболи": Бугун "Андижон" ва "Қўқон-1912" ўйини

"Андижон" - "Қўқон-1912". Кичик дербида қўқонликлар ғолиб

Кеча ёшлар лигасининг 19-туридан ўрин олган "Андижон" - "Қўқон-1912" учрашуви бўлиб ўтди. Унда Маъруф Зокиржонов томонидан урилган икки гол қўқонликларга ғалаба келтирди.

Шу тариқа, "Қўқон-1912" ёшлари ўз очколарини 28тага етказиб олишди ва 8-ўринга чиқиб олишди. "Андижон" ёшлари ҳисобида 14 очко бор, жамоа 15-ўринда.

Бугун асосий таркиблар ўртасидаги ўйин соат 17:00да Андижондаги "Соғлом Авлод" стадионида бошланади. Ўйин превьюсини ўқимаганлар учун ҳавола.


"Нефтчи": Ёшларимиз "Металлург"дан устун келишди

Кеча "Нефтчи"нинг ёшлари ўз майдонида "Металлург"ни қабул қилиб 1:0 ҳисобида ғалаба қозонишди. Ягона голни Ҳаёт Ёқубов бекободликлар дарвозасига урди. "Нефтчи" ёшларининг очколари сони 25тага етди, жамоа 10-поғонада бормоқда.

Бугун асосий таркиблар ўртасидаги баҳс соат 18:30да бошланади. Барча мухлисларни "Истиқлол" стадионига таклиф қиламиз.


"Навбаҳор": Ёш "лочинлар" "Сўғдиёна"га ютқазишди

Наманганнинг "Навбаҳор" клуби олий лиганинг 19-турини бугун Жиззахда "Сўғдиёна"га қарши ўтказади. Ушбу ўйин соат 18:00да старт олади.

Кеча жамоанинг ёшлари "Сўғдиёна" ёшларига 0:1 ҳисобида ютқазиб қўйишди. Шу тариқа, ёш "лочинлар" 17 очко билан 13-ўринда қолишди.