"Водий футболи": 29-турда умуман ғалаба йўқ

"Навбаҳор": Ғузорда мағлуб бўлдик

Олий лиганинг 29-турида Наманганнинг "Навбаҳор" клуби Ғузорда "Шўртан" клуби меҳмони бўлди. Учрашувда "лочинлар" 1:3 ҳисобида ютқазиб қўйишди. "Навбаҳор" ҳисобидаги ягона голни Дилшод Жабборов урди.

Жамоа 37 очко билан мусобақа жадвалининг 7-поғонасида бормоқда. Сўнгги турни "Навбаҳор" ўз майдонида "Локомотив" клубига қарши ўтказади.


"Нефтчи": "Бухоро"га ютқазиб қўйдик

Фарғонанинг "Нефтчи" клуби бугун Бухоро меҳмони бўлиб 1:3 ҳисобида имкониятни бой бериб қўйди. "Нефтчи" таркибида ягона голни Умид Қодиров урди.

Фарғоналиклар 49 очко билан бешинчи ўринда боришмоқда. Жамоа мавсумни шу ўринда тугатиши аниқ бўлди.

Охирги турда "Нефтчи" ўз уйида "Қизилқум"га қарши ўтказади.


"Қўқон-1912": Ўз майдонимиздаги охирги ўйинда ютқаздик

Олий лиганинг 29-турида "Қўқон-1912" ўз уйида "Сўғдиёна"ни қабул қилди. Ўйинда меҳмонлар 3:1 ҳисобида зафар қучишди. Қўқонликлар сафида ягона голни Отабек Ҳайдаров Жиззах клуби дарвозасига урди.

30-турни "Қўқон-1912" Тошкентда "Бунёдкор"га қарши ўтказади.


"Андижон": Олий лигада қолдик

Сергей Ковшов бошчилигидаги "Андижон" клуби бугун ўз майдонида "Динамо"ни қабул қилди. Ўйинда 1:1 ҳисоби қайд этилди. "Бургутлар" сафида Фарҳод Бекмуродов тўп киритди.

Ўз очколарини 28тага етказиб олган "Андижон" 13-ўринни сақлаб қолди ва олий лигада қолиш вазифасини бажарди.

Охирги турни "бургутлар" Тошкентда "Пахтакор"га қарши ўтказади.