Виталий Левченко: "Сўнгги 3 ўйинда 6 очко йўқотдик"

Виталий Левченко: "Бугун икки кучли жамоа тўқнаш келди. Жадвал, ўйин сифати бўйича бир-бирига яқин жамоалар учрашди ва биринчи голни урган жамоа ғалаба қозониши керак эди. Ўша гол эгаси биз бўлганимиздан хурсандман.

- Бугуни ўйинда таркибида бир қатор ўзгаришлар рўй берди, бу "Олимпик"га қарши ўйин олдидан тактиками?

- Чемпионат ўртасига етиб келдик. 8та турни битта таркиб билан ўтказдик, ротациялар бўлмади. Баъзи футболчиларда жисмоний чарчоқ борлиги туфайли ротация амалга оширдик. Янгиларда эмоция, жисмоний ҳолат бошқача бўлади. Улар бугунги баҳсни бузиб қўйишмади. Асосан тажрибалиларни майдонга туширдик, захирадан ўйинга қўшилган ёшлар учрашувга агрессия қўшди ва биз мақсадга эришдик.

- Дарвозани бугун тажрибали Акбар Тўраев эмас ёш Владимир Назаров қўриқлади.

- Акбар Тўраев деряли барча ўйинларда даврозамизда эди. Сўнгги 3та баҳсда дуранг қайд этдик, гол уряпмиз, аммо рақиб ҳам дарвозамизни ишғол қиляпти. Керакли бўлган 6 очкони йўқотдик. "Юниред" билан баҳсда дарвозада ишончли ўйнаган Владимир Назаровга бугун имкон бердик ва адашмадик.

- Ёшлар жамоаси ўйинларини ҳам кузатиб боряпсизми? Улар орасида асосий таркибга "тортадиганлар" борми?

- Валиев, Рўзиев ва Муҳаммадовлар ўзини яхши кўрсатишяпти. Ҳаммани кузатяпмиз. Таркибда 21 нафар футболчи бўлгани учун ёшларни асосий жамоага қўша олмаймиз. Жароҳат олганлар ўрнига ёшларни жалб қиляпмиз. Улар биринчи жамоага осон кўникиб кетишмоқда.