Вадим Абрамов: Самарқанд — иккинчи пойтахт. Шундай экан, бу ерда яхши жамоа бўлиши керак"

- Ўйин ҳақида...

- Биринчи бўлимда кўнгилдагидек ўйин намойиш эта олмадик, шу боис ўзгаришлар қилишга мажбур бўлдик. Иккинчи бўлим эса яхшироқ ўтди. Кетма-кет уч ўйинда мағлубиятга учраганимиз сабабли босим бор эди. Йигитлардан қийин ўйинда ҳисобда ортда бора туриб, вазиятни ўз томонимизга оғдиргани учун миннатдорман. "Металлург" яхши даражадаги жамоа. Биз уларнинг уюшқоқлик билан ўйнашини билардик. Улар ҳам аввалги баҳсларда очко йўқотиб, ғалаба учун майдонга тушганди. Умуман олганда, ғалаба илинжидаги икки жамоа тўқнашди. Бугун бизга омад кулиб боқди. 

- Бугун Хожимирзаев яхши ўйнади. Уни Кожо билан бирга асосий таркибда кутишимиз мумкинми ёки захира ўйинчиси бўлиб қолаверадими?

- Йўқ. Хожимирзаев яхши даражадаги тартибли футболчи. Шу боис, биз ҳар доим футболчиларга имкон берамиз.

- Фарруҳ Икромов нега майдонга туширилмади?

- Фарруҳ Хожимирзаев ва Кожо билан бир позицияда тўп тепади. Шу боис, у позиция учун курашиши керак. У ҳам жамоамиз лидерларидан бири ҳисобланади. 

- Кожо икки кун илгари терма жамоада ўйин ўтказганди. Уни майдонга тушишини ким кўпроқ истади: сизми ёки ўзими?

- Ҳа, у жамоамизга бугун қайтди ва тушлик пайти пайдо бўлди. Принцип жиҳатдан бу нормал ҳолат, агар у майдонга тушишни хоҳласа, нега имкон бермаслик берак? Асосийси, унда хоҳиш бор эди. 

- Эшитимизга қараганда, сўнгги уч мағлубиятдан сўнг клуб раҳбарияти томонидан сизга охирги имконият берилган экан. Бу тўғрими?

- Билмадим, бу гапни сизга ким айтган, мен бу ҳақда билмайман. Лекин футболда ҳар қандай мураббийнинг тақдири шундай. Раҳбарият сиздан натижа талаб қилади. Бу нормал ҳодиса. Мен бу ҳолатга тушиши мумкин бўлган биринчи ёки охирги одам эмасман. Бунинг ажабланарли жойи йўқ.

- "Динамо" футболчиларининг майдонда бир-бирини тушунишида жиддий муаммо мавжуд. Бугунги ғалабадан сўнг клуб раҳбарияти билан гаплашиб олиш имконияти пайдо бўлгандир.

- Муаммолар мендан олдин ҳам мавжуд эди ва ҳал қилинмаган. Бу савол мен учун эмасдир. Бизда майдон, ҳатто машғулот ўтказадиган ўйингоҳлар билан боғлиқ муаммолар бор.

- Бу, эҳтимол, жисмоний ҳолат билан боғлиқдир...

- Албатта, биз уч ўйин ютқаздик, аммо индамадим. Чунки бу баҳонага ўхшаб кетарди. Афсуски, муаммо бор. Аммо ишончим комилки, вилоят ҳокими футболга катта эътибор қаратади ва муаммоларни ҳал қилади. Самарқанд — туристик шаҳар ва принцип жиҳатдан, иккинчи пойтахт ҳисобланади. Шундай экан, бу ерда яхши жамоа бўлиши керак. Шунчаки қуйи лигага тушиб, яна юқори лигага кўтариладиган жамоа бўлмаслиги лозим. Бу йил ўз олдимизга жиддий мақсадлар қўйганмиз. Умид қиламаник, вазифани уддалай оламиз. Аммо муаммолар ҳал қилиниши керак.

- Бугунги камбэк келгуси ўйинларга қанчалик таъсир ўтказиши мумкин?

- Футболда бундай ҳолатлар ўзгарувчан бўлади. Буни вақт кўрсатади, лекин ҳар бир ўйинга финалга чиққандек тайёргарлик кўришимиз керак. Айтмоқчиманки, бир неча турдан сўнг кимнинг кимлиги равшан бўлади. Аммо барча жамоалар бир хил имкониятга эга. Ҳар бири ғалаба қозониши ва ютқазиши мумкин. Эҳтимол, лидер пайдо бўлиши мумкин, масалан, "Насаф", чунки уларда тизимли мактаб мавжуд ва барқарор таркибга эга. Шу боис, "Насаф" стабиллиги билан бошқалардан ажралиб туради, қолганлар эса бир-биридан фарқ қилади.

- Нега Абрамов самарқандлик ўйинчиларни ўйнатмайди? Масалан, Дамир Темиров таркибга қайтган, аммо унга имкон берилмади ҳатто бугун қайдномага ҳам киритилмади. 

- Биз маҳаллий футболчиларга ишонамиз. Темиров икки кун олдин умумий гуруҳ машғулотларида жароҳат олган. Шу боис, у қайдномага киритилмади. Аввал таркибда самарқандликлар кўп бўлган. Аммо футбол шундай нарсаки, бу сизнинг яшаш жойингизга боғлиқ эмас, шу боис рақобатда енгиб чиқиш керак. Рақобатда енгиб чиқсангиз, марра сизники. Воҳиджон Оқбўтаев бугун ўйнади, аммо маҳаллий мухлислар уни захирага олишни талаб қилиб ҳайқиришди.