"UZREPORT TV" АПЛ ўйинларини кўрсатади

Бироз олдин uzreport.uz сайти "UZREPORT TV" телеканали Англия Премьер-лигаси ўйинларини кўрсатиш учун эксклюзив ҳуқуқларни харид қилганини маълум қилди.

Телеканалнинг расмий сайти ёзишича, бу янгилик бугун Халқаро бизнес-марказда бўлиб ўтган УЕФА Чемпионлар лигасини "UZREPORT TV"да кўрсатиш ҳақида ўтказилган матбуот-анжуманида хабар қилинган.

Матбуот-анжуманида УЕФА футбол клубларининг эксклюзив тижорат агенти "TEAM Marketing" (Швейцария), "SARAN MEDIA INTERNATIONAL" компанияси (Мальта), "UZREPORT TV" телеканали ва ОАВ иштирок этди.

Мамлакатимизда инглиз футболига бўлган катта қизиқиш туфайли "UZREPORT TV" Англия Премьер-лигаси ўйинларини Ўзбекистон Республикасида бепул кўрсатиш эксклюзив ҳуқуқини сотиб олди. АПЛ ўйинлари ноябрь ойидан кўрсатиш режалаштирилмоқда.