Тимур Кападзе: "Ўз хатоларимиз эвазига ютқаздик. Ҳимоячиларимизга саволларим бор"

- Ўйин ҳақида

- Самарқандликларни ғалаба билан табриклайман. Чиройли ўйин гувоҳига айландик. Мухлислар голлар шодиёнасига гувоҳ бўлишди. Мағлубиятдан афсусдамиз. Икки марта ҳисобда олдинга чиқиб олиб, керакли натижани сақлаб қола олмадик. Биринчи бўлимда ҳам кўп вазият яратдик. Ўйинга яхши тайёргарлик кўргандик, бироқ ҳимоядаги хатоларимиз қимматга тушди. Реализация ўз ролини ўйнади. Вазиятлардан унумли фойдаланганимизда, ҳисоб бошқача кўриниш олган бўларди. Мағлубиятдан тўғри хулоса чиқарамиз. 

- Бугун жамоа пухта тайёргарлик кўргани сезилди. Рақиб жамоанинг ўйинлари бўлмаса, қандай ўргандингиз?

- Йўқ, бизда рақиб жамоанинг ўйинлари бор эди. "Динамо"да яхши жамоа шакллангани кўриниб турибди. Легионерлар ҳам савияли. Самарқандликлар бежизга Про лигада мағлубиятсиз серия қайд этмаяпти ҳамда бежизга "Пахтакор"ни мағлуб этмаган. Афсуски, хатолар эвазига голлар ўтказдик. Ҳимоячиларга саволларим бор. хатолар устида ишлаймиз. 

- Қўшимча бўлимлар аввалида жисмоний устунлик ёшлардан иборат "Олимпик"да бўлиши керак эди. Наҳотки, бу ҳам ёрдам беролмади?

- Гувоҳи бўлганингиздек, жисмоний жиҳатдан биз ютқазмадик. Аксинча, рақибда бу борада муаммолар кўзга ташланди. 90 дақиқадан кейин йигитларнинг ҳолатини сўрадим ва ижобий жавоб олдим. Майдоннинг ўти баланд экан, бу оёқнинг қўшимча куч сарфлашига олиб келади. Мағлубиятда жисмоний ҳолат эмас, индивидуал ва тактик жиҳатдан айб қидириш керак. "Динамо"га яна бир бор омад тилайман ва барчани Мустақиллик куни билан табриклайман.