Тимур Кападзе: "Ғалабага ҳақли эдик деб ўйлайман"

Ўйин ҳақида

- Албатта бугунги ўйинга яхши тайёргарлик кўрдик. Наманганда ўйнаш осон эмаслигини биламиз. "Навбаҳор"ни мухлислар қўллаб-қувватлашади. Шунга қарамай йигитлар ўзини йўқотиб қўйишгани йўқ. Бугун яхши ҳаракат қилдик. Гол урдик, бироқ ўйиннинг охирги қисмида гол қўйвордик. Биз ғалабага ҳақли эдик деб ўйлайман. Жарима бўйича ҳам савол бор, "жонли девор" ҳам 11 метрга сурилди. Лекин майли, муҳими йигитлар кўплаб мухлислар қаршисида тажриба тўплашди.

- "Олимпик" яхши лойиҳа. Шу лойиҳани вилоятларга бериш мумкинмиди? Масалан, мухлисларга тўлиб тошган стадионда ўйнаш барибир бошқача бўларди...

- Албатта, биз бу лойиҳани ташкил этганда мақсадни кўзлаб ҳаракат қилгандик. "Олимпик" лойиҳаси ўзини оқлаяпти. Ўтган давр мобайнида йигитлар анча ўсишга эришди. Терма жамоа бош мураббийи сифатида мен учун яхши. Чунки тайёр жамоа бор, бундан ташқари бошқа жамоаларда ҳам номзод футболчилар ўйнайди. Ҳозир бизда рақобат жуда кучли. Балки келгусида буни амалга ошириш мумкиндир. Ҳозир барча мақсадларимиз олимпиадага қаратилган.

- Тўғри айтдингиз, "Олимпик" яхши лойиҳа. Биз Париж олимпиадаси йўлида жамоага омад тилаймиз. Жамоа йигитлари ўсишга эришмоқда. Аммо, бугун баъзи футболчилар ўйин мобайнида кўп эътироз қилишди, тортишиб кетишди. Бу холат жамоанинг келажагига салбий таъсир кўрсатмайдими?

- Сизга шундай кўринган бўлиши мумкин. Майдонда катта-кичик деган тушунча йўқ. Рақибга ҳурмат сақлаган холда фикрини билдиришга ҳаққи бор. Камчиликлар бор бўлса, албатта биз мураббийлар футболчиларга тушунтирамиз.