"Спорт" каналида бугун еврофутбол жонли кўрсатилади

"Штутгарт" ҳамда "Фортуна Дюссельдорф" жамоалари ўртасидаги баҳс орқали Бундеслиганинг 4-тури бошланади.

Тайфун Коркут бошчилигидаги мезбонлар ҳозирга қадар ўтказилган учта ўйиндан бирортасида ғалаба нашидасини суришгани йўқ. Дебютант "Фортуна Дюссельдорф" эса 3 учрашувда 3 хил натижа қайд этган.

Турнир жадвали эътибори билан қаралганда, тўқнашувда меҳмонлар фаворит мақомида бўлишади. Аммо "Штутгарт" ўз уйида ўйнаши ва жамоалар ўртасидаги фарқни инобатга оладиган бўлсак, унда мезбонлар бу мақомга кўпроқ лойиқ.

Факт шуки, бу жамоаларнинг ўзаро учрашувида устунлик "Фортуна Дюссельдорф" тарафида. Бугунги баҳс нафақат бу икки жамоаларнинг ўзаро беллашуви сифатида, балки мураббийлар тўқнашувига айланиши кутилмоқда. Тайфун Коркут ҳамда Фридхельм Функель баҳси ҳам кўпчилик учун қизиқ беллашувга айланади.

Мазкур ўйин бугун кеч соат 23:30да бошланади. МТРК расмий сайти хабарига кўра, Бундеслиганинг 4-туридан ўрин олган дастлабки ўйин "Спорт" телеканали орқали жонли эфирда олиб кўрсатилади.

Эслатиб ўтамиз, "Спорт" канали Германия чемпионати ўйинларини кўрсатиши ҳақида эълон қилганди. Айнан мазкур ҳафтадан бошлаб Бундеслига ўйинлари жонли эфирда кўрсатилиши кутилмоқда.

Бундеслига, 4-тур.

"Штутгарт" - "Фортуна Дюссельдорф" (23:30 - Спорт)

"Мерседес-Бенц Арена".

Бош ҳакам: Роберт Хартманн.