Шуҳрат Раҳмонқулов: “Болтабоев ва Абдуллаевнинг биринчи лига баҳсларида ўйнаб маҳоратини оширгани анчагина фойдали бўлди”

- Албатта, шогирдларимизнинг ютуғидан қувонамиз. Истардимки, бу улар учун сўнгги шахсий ютуқ эмас, бошланиши бўлишини – дея гап бошлади Раҳмонқулов. - Жамшид ҳам Иззатилла ҳам бунга муносиб эди. Сабаби бу икки шогирдимиз БААда бўлиб ўтган кичик мундиалда ўзларини ҳар томонлама кўрсата олишди. Айниқса Жамшид Болтабоев майдон марказида ақлли ҳаракатлари билан кўпчиликда илиқ таассурот қолдирди.

- Биласизми, Болтабоев ва Абдуллаев ўтган йили биринчи лигада “Пахтакор-2” ва “Зарафшон” сафида ўйнаб анчагина тажриба оширди. Биринчи лигада ўзидан катта ёшдаги футболчиларга қарши ўйнашди. Шу тариқа табиийки улар билан тенгма-тенг ўйнаб анчагина ўсишга эришди. Шунинг учун  жаҳон чемпионатида ўз тенгқурларига қарши чўчимай ўйнашди. Менимча уларнинг айнан биринчи лига баҳсларида ўйнаб маҳоратини оширгани анчагина фойдали бўлди.

- Жамшиднинг ҳам Иззатилланинг ҳам майдон ташқарисидаги ҳарактерлари жуда яхши. Бу футболчилр билан кўп ишлаганим учун сизга шундай фикр билдирмоқдаман. Оғир босиқ, ўзини ҳар қандай холатда ҳам тута билади. Мақтовлардан кейин ўзгариб қолмасликлари даркор. Шунда кейинчалик ҳам ҳурмат қозонади. Тўғри, бундай ёшдаги ўйинчиларда мақтовлардан кейин қандайдир салбий ўзгаришлар учраб туради. Лекин ўйлайманки шогирдларимиз билан бу каби холат юз бермайди.

- Иккиси ҳам ўсадиган футболчи. Бунинг учун машғулотларда ҳар бир машқни сидқидилдан бажариб, ўз устиларида кўпроқ ишлаш зарур. Бирор бир холат бўйича ёндошмасдан, умумий қараш керак. Жамшид ҳам Иззатилла ҳам яқин йиллар мобайнида “Пахтакор”нинг асосий таркибига кириш учун бор кучларини бериб ишлаши лозим. Ишонаманки улар буни уддасидан чиқади. Камчилик ҳамма инсонда бўлади. Шу жумладан юқорида номлари келтирилиб ўтилган ўйинчиларимизда ҳам бор. Хусусан кимгадир тезлик етишмаса, яна бошқаси қайсидир жиҳат бўйича оқсайди. Шунинг учун ўз устида ишлашни бундан кейин ҳам сусайтиришмаса янада ўсишга эришиши мумкин.