Гадоевнинг дебюти муваффақиятли чиқди

"Кей-Лига 2" мусобақасининг (бизнинг Про-Лига билан тенг дивизион) 3-тур доирасида унинг жамоаси "Тэджон Ситизен" ўз майдонида "Сеул И-Лэнд" клубини қабул қилди.

Гадоев баҳсни аввалига захира ўриндиғида бошлади. 70-дақиқага келиб, мезбонлар бош мураббийи Ко Чжун Су, ўйинда бурилиш ясаш мақсадида, Шоҳруҳни, ниҳоят, майдонга туширди. Ва тез орада ярим ҳимоячимиз унга билдирилган ишончни оқлади. 77-дақиқада ўзининг доимий чап қанотида рақибни тезликда ортда қолдириб, жарима майдончасига ёриб кирган Гадоев сеулликлар ҳимоячиси томонидан қўполлик билан йиқитилди. Ҳакам дарҳол пенальти белгилади. 11 метрли жарима зарбасини эса бразилиялик Педро Энрике аниқ амалга оширди. Шу 1:0 ҳисоби беллашув охиригача сақланиб қолди. Ўйин видеосини қуйидаги ҳаволада томоша қилиш мумкин. ВИДЕО

Кўпсонли ўзбек футболи мухлислари номидан биз Шоҳруҳ Гадоевни Жанубий Кореядаги омадли дебюти билан табриклаймиз. Шоҳруҳ, фақат олға!