Шаҳбоз Беғамов: "Пахтакор" Войнески давридаги жамоадан кўра икки карра камроқ вазият яратмоқда"

"Насаф" мухлисларини ғалаба билан табриклайман.

Жамоа бугун ўйин тарафлама, тактик томондан ва вазиятлар яратиш борасида "Пахтакор"дан устун ўйнади. "Пахтакор" реал имконият ёки вазият яратмади. Жуда бўш ўйнади. Иштиёқ жиҳатдан ҳам "Насаф" рақибига қараганда икки карра кўпроқ ғалабани истади.

"Пахтакор" футбол ўйнаган темп ўрта даражадан паст, агрессия ноль ва иштиёқ буткул кўринмади. Табиийки бундай бўш ўйинда бирорта айтарли вазият яратилмади.

Ўйиндаги гол "из ничего", "фонарь" урилди, тўғри. Лекин шундан кейин "Насаф" катта жамоалардек тартиб билан натижага қаратилган ўйин қилди. Менимча, "Насаф" бугун "Пахтакор"дан кўпроқ ва кучлироқ қаршилик кутганди. "Насаф" жуда осон ютиб кетди.

Кулгули эшитилиши мумкин, лекин "Пахтакор" қаторасига нечанчи ўйиндирки Войнески давридаги жамоадан кўра икки карра камроқ вазият яратмоқда. Славче пайтида жамоа ўйинида тартиб бўлмаган бўлсада, ҳужумдаги вазиятлар етарлича ташкил қилинган. Шунчаки "реализация" жуда паст бўлганди.

"Пахтакор" чемпионлик ўйинини ўз уйида ютқазди. "Насаф" энг қийин рақибига қарши Тошкентда муҳим ўйинни ўз фойдасига ютди.

Суперлига чемпионлик пойгасида жуда катта бурилиш.

Буёғига "Насаф" чемпионат пешқадами сифатида қолган 6 турни жуда юқори босимда ўтказади. Жамоа менталитет жиҳатдан бунга тайёрми? Агар тайёр бўлса, унда қаршилик мухлислар жуда узоқ кутган онларга оз қолди. "Насаф" иштирокидаги ўйинлар жуда катта қизиқиш ва ажиотаж уйғотади", деб ёзади Беғамов.