Сервер Жепаров бошқа "Истиқлол"га ижарага берилади
31 янв 2017 09:20
Новости

Сервер Жепаров бошқа "Истиқлол"га ижарага берилади

Ўзбекистонлик ярим ҳимоячи Сервер Жепаров яқинда Теҳроннинг "Истиқлол" клуби билан 1,5 йиллик шартнома тузгани ҳақида хабар бергандик.

Бироқ кейинроқ "Истиқлол"га 2017 йилнинг илк ойида янги футболчиларни рўйхатдан ўтказиш таъқиқлангани ҳақида хабарлар чиқди. Маълум бўлишича, Жепаровнинг янги клуби 2016 йилда ушбу жамоада тўп тепган немис ярим ҳимоячиси Одил Чихининг маошини бермаган ва ФИФА бу борада "Истиқлол"га нисбатан жазо қўллаган.

Шу боис Теҳрон клуби ўзбекистонлик футболчини Хузистоннинг "Истиқлол" клубига ярим йил муддатга ижарага бермоқчи. Бу ҳақда Эрон нашрлари хабар бермоқда. Ушбу клуб ўтган мавсум сенсацион тарзда Эрон чемпиони бўлганди.

"Истиқлол Хузистон" 2017 йилги Осиё чемпионлар лигаси гуруҳ босқичида иштирок этади. Жамоа "B" гуруҳида "Ал Жазира" (БАА) ва "Лаҳвия" (Қатар) билан ўйнайди. Ушбу гуруҳнинг охирги иштирокчиси плей-офф баҳсларидан сўнг аниқланади. Агар Қаршининг "Насаф" клуби "Ал Ҳидд" ва "Ал Фатеҳ"ни (Саудия Арабистони) мағлуб этса айнан шу гуруҳдан жой олади.

Хузистоннинг "Истиқлол" клуби 2008 йил ташкил топган. Ўз уй ўйинлари Хузистондаги 38900 томошабинга мўлжалланган "Ғадир" стадионида ўтказади. Айни пайтда жамоани Сируш Пурмоусави бошқариб бормоқда.