Саудия Арабистони терма жамоасининг уч нафар етакчи футболчиси Олимпиадага боради

Спортнинг футбол тури бўйича мусобақада Саудия Арабистони U-23 терма жамоаси ҳам иштирок этади. Жамоа бош мураббийи Саад Ал Шеҳрининг айтишича, шу кунларда якуний таркиб маълум бўлади. 

Шуниси аниқки, 3 нафар ёши катта футболчи сифатида миллий жамоа етакчилари - Салмон Ал Фараж, Салим Ал Довсари ва Ёсир Ал Шаҳрони ҳам Токиода ўтказиладиган Олимпия ўйинларига боришади. Биласиз, ҳар учала футболчи ЖЧ саралаш баҳсларида ўзларини кўрсата олишди.

Саудия Арабистони олимпия терма жамоаси 23 июнь куни Ар Риёдда йиғилиб, 14 июлга қадар йиғин ўтказади. Бу жамоанинг мусобақа олдидан бешинчи, яъни охирги йиғини бўлади. 

Олимпия ўйинларида ҳар бир терма жамоа 23 ёшгача бўлган футболчилар билан ташриф буюради. Лекин мусобақа регламентига кўра, уч нафар ёши катта футболчини қўшиб олса бўлади. Шу боис саудияликлар мураббийи "Ал Ҳилол" етакчиларидан фойдаланишга қарор қилди. 

Саудия Арабистони U-23 терма жамоаси Олимпиадада Бразилия, Германия ва Кот-д'Ивуарга қарши гуруҳ баҳсларини ўтказади. Олимпия ўйинларида футбол учрашувлари 22 июлдан старт олади.