Сарвар Каримов: "Дарвозабон ҳар қандай ҳолатга тайёр туриши керак. Гоҳида йиллаб захирада қолиб кетиши мумкин"

Қизиқарли ва муросасиз кечган учрашувда Фаррух Икромовнинг ягона голи мезбонларга ғалаба келтирди. Ўйиннинг қолган дақиқаларида дарвозабон Сарвар Каримов жамоасини муқаррар голлардан қутқариб ютуққа муносиб ҳиссасини қўшди, дея оламиз. Ушбу учрашувдан сўнг маҳоратли кипернинг фикрлари билан қизиқдик.

"Кубок баҳси битта ўйиндан иборат эканлиги боис масъулиятни ҳис қилиб тургандик. "Навбаҳор" билан баҳсга қаттиқ тайёргарлик кўрганимиз самара берди, деб ўйлайман. Машғулотларда барча бирдек меҳнат қилди. Меҳнатларимиз зое кетмаганидан хурсандмиз. Мухлисларни кейинги босқич йўлланмаси билан табриклайман. Анча вақтдан сўнг ўз майдонимизга қайтдик. Қайтишимиз ғалабали якунланди. 

Бевосита ўйинга тўхталадиган бўлсак, икки хил тайм гувоҳига айландик. Биринчи бўлимда биз, иккинчи бўлимда "Навбаҳор" устунликка эга бўлди. Агарда ҳисобдан келиб чиқадиган бўлсак рақиб босимни ошириши табиий ҳол эди. 

Жорий мавсумдаги илк ўйинимни "Машъал"га қарши зихирадан майдонга тушганда ўтказдим. Шундан сўнг мураббийлар менга ишонч билдиришмоқда. Дарвозабоннинг тақдири шу. Керак бўлса, йиллаб захирада қолиши мумкин. Шундай экан ҳар қандай вазиятга тайёр туриш керак",- дейди Сарвар Каримов.