Санжар Турсунов: "Жарима майдонимизда тўп қўлимга текканди"

Ўйин ҳақида

Ўйин яхши руҳда ўтди. "Андижон"нинг бундай ўйин намойиш этишини кутгандик, чунки уларнинг тактикасини ўргандик. Энг асосийси — ўзимиз кутган натижага эришдик. Бундан хурсандмиз.

- Биринчи бўлимда оддий вазиятларда тўп йўқотдингиз. Бу ҳолат ўйинга мослашишга бўлган қийинчилик туфайлими ёки майдон ҳолати билан боғлиқми?

- Барча футболчи хато қилади. Майдон ҳолати ҳам анча ноқулай эди. Ўзимда ҳам камчилик кузатилгандир. Шундай бўлса-да, ғалаба қозондик. АГМКда ўз манфаатимиздан кўра жамоа манфаати устун туради.

- Гол урган вазиятингиздаги стандарт вазият машғулотларда ишлаб чиқилган режа бўйича киритилдими ёки вазият тақозо этдими?

- Вазият шуни тақозо этди. Шеригим пас бергач, зарба бериш учун қулай вазият юзага келди ва бундан фойдаландим.

- 55-дақиқада рақиб бурчак зарбасини ўйинга киритгач, ўз жарима майдонингизда тўп сизнинг қўлингизга теккандек кўринди. Ўша вазиятга ойдинлик кирита оласизми?

- Ҳа, тўп қўлимга теккан десам ҳам бўлади, сабаби, бироз пастга эгилган ва табиий ҳолатда эди, тўп қай ҳолатда қўлимга текканини ҳакам кўриб турганди. Биринчи бўлимда, рақиб футболчисининг қўлига ҳам худди шундай ҳолатда тўп текканди. Ўша вазиятда ҳакамга эътироз билдирганимда, ҳакам сабабини тушунтириб берди. Шу сабабдан индамадим.

- Мусобақани кўп карра ғолибларидан бири — "Пахтакор" тарк этди. Бу ҳолат ғолиблик учун имкониятларингизни оширадими?

- Мусобақани ким тарк этиб, ким қолганига кўп аҳамият бермасдан, ўз ўйинларимизда ғалаба қозонишга ҳаракат қиламиз.