Самвел Бабаян: "Ҳар бир ўйин бизга олдиндаги учрашувларга тайёргарлик вазифасини ўтайди"
21 апр 2024 21:34
Новости

Самвел Бабаян: "Ҳар бир ўйин бизга олдиндаги учрашувларга тайёргарлик вазифасини ўтайди"

Ўзбекистон кубогининг 2-туридан ўрин олган "Навбаҳор" - "Андижон" (2:1) учрашувидан сўнг мезбонлар бош мураббийи Самвел Бабаян матбуот анжуманида иштирок этди.

Ўйин ҳақида

- Биринчи навбатда "Навбаҳор" мухлисларини ғалаба билан табриклайман. Қийин ўйин бўлди, шунга қарамай натижани ўз фойдамизга ҳал қила олдик. Учрашувдаги ҳар бир вазиятни синчиклаб кузатиб борган мухлислар гувоҳ бўлишди, бугун йигитлар ғалаба иштиёқи билан ёниб ўйнашди. Албатта чиройли ўйин ва жамоавий характер учун футболчиларга миннатдорчилик билдираман. 90 дақиқа давомида хотиржамликни сақладик, ўйинни назорат қилишга интилдик.

- "Навбаҳор" кейинги босқич масаласини биринчи ўрин билан ҳал қилди. "Динамо" билан ўйинда ёшлар таркибидан фойдаланиш мақсадингиз борми?

- Навбатдаги босқич масаласини ҳал қилдик, бу тўғри. Бироқ ҳар бир ўйин биз учун кейинги учрашувларга тайёргарлик вазифасини ўтаб беради. Ротациялар қиламиз, бунда ўйин амалиёти кам футболчиларнинг имкониятларини чамалаб оламиз. Бироқ бу дегани "Динамо" билан ўйинда асосий таркиб ўйнамайди дегани эмас. Шу ўйинда қандай ўйнасак, навбатда бошланадиган Суперлига учрашувларига услубни танлаб оламиз.