Роналдунинг "Ман Сити"га ўтиши: бу эртакми ё ҳақиқат?

"Шаҳарликлар" футболчига йилига 15 млн евро маош билан 2 йиллик шартнома таклиф қилишга тайёр. Қизиқ томони, инглизлар раҳбарияти "Ювентус" Роналдуни буткул текинга қўйиб юборишига ишонмоқда. Ваҳоланки, Роналду ва Турин клубининг 2022 йил ёзигача амал қилувчи шартномаси бор. Ўз навбатида, узун-қулоқ гапларга қараганда, "кекса сеньора" Криштиану учун камида 30 млн евро ёки Габриэл Жезусни қўлга киритиш ниятида.

Охирги маълумотларга қараганда, "Ман Сити" нафақат бразилиялик футболчисини қўйиб юбормоқчи, балки 36 ёшли футболчи трансфери учун 30 млн евро тўлашни ҳам истамаяпти.

Ўзи Роналду манчестерлик шайхларга керакми?

"Шаҳарликлар" Лондоннинг "Челси" клубига (0:1) бой берган Европа Чемпионлар Лигаси финали кўрсатганидек, жамоа фақат қанотлардан ҳужум қилиб, амалда марказий ҳужумчисиз ўйнаши жуда мураккаб жараён. Шу сабабли, "шайхлар" бутун трансфер ойнаси давомида "Тоттенхэм"га Харри Кейн учун 100 млн евродан кўпроқ маблағ таклиф қилишди. Бироқ кеча Англия термаси сардори яна бир йил Лондонда қолиши расман аниқ бўлди. Деярли барча буни футболчининг ўзидан билди:

"Мен бу ёз "Тоттенхэм"да қоламан ва бор эътиборим жамоа муваффақиятларига ҳиссамни қўшиш учун қаратилган", — деб ёзди Кейн "Twitter"да.

Бу ёз Харрини қўлга киритиш имконсизлигини тушунган "Ман Сити" Роналду вариантига эътибор қаратгани қатор ОАВларда таъкидлана бошлади. Футболчининг ўзи ҳам "Ювентус"ни шу трансфер ойнасидаёқ тарк этиш пайида юрибди. Бир қарашда "шаҳарликлар" учун Криштиану трансферига футболчининг катта маош талаб қилиши ва ёши сабаб (Италия чемпионатининг ўтган мавсумдаги тўпурари ҳозирда 36,5 ёшда) саволлар етарли. "Сити" талаби оддийроқ ва ёшроқ ҳужумчи харид қилгани маъқул. Жамоада Гвардиола фалсафасига мос тушадиган ёш Ферран Торрес борлигини ҳам унутмаслик лозим.

Агар трансфер амалга ошса, Роналду "Сити"ни кучайтира оладими? 

Бу саволга жавоб бериш учун дастлаб португалиялик футболчининг "МЮ" ва "Юве"даги  статистикасига мурожаат қилсак. Нега айнан бу икки жамоа дейсизми? Чунки "Манчестер Юнайтед"да португалиялик айнан АПЛда тўп тепган, "Ювентус"даги статистика эса футболчининг бугунги кундаги даража ва ҳолатини аниқлаб беради.

"Қизил иблислар" сафида Криштиану 292 ўйинда майдонга тушган (196 – АПЛ, 55 – ЕЧЛ, 26 – Англия Кубоги, 12 – Лига Кубоги, 2 – Клублар ўртасидаги ЖЧ, 1 – Англия Суперкубоги);

Голлар: 118 (84 – АПЛ, 16 – ЕЧЛ, 13 – Англия Кубоги, 4 – Лига Кубоги, 1 – Клублар ўртасидаги ЖЧ);
Ассистлар: 61;
Голлар ва ассистлар ўртача ҳар мавсум: 30;
Хет-триклар: 1;
Сариқ карточкалар: 42;
Қизил карточкалар: 4.

Айни дамда "кекса сеньора" сафида португалияликнинг статистикаси қуйидагича кўриниш олган:

Ўйинлар: 136 (100 - А Серия, 23 - ЕЧЛ, 10 - Италия Кубоги, 3 - Италия Суперкубоги)
Голлар: 101 (81 - А Серия, 14 - ЕЧЛ, 4 - Италия Кубоги, 2 - Италия Суперкубоги);
Ассистлар: 22;
Голлар ва ассистлар ўртача ҳар мавсум: 41;
Хет-триклар: 3;
Сариқ карточкалар: 13;
Қизил карточкалар: 1.

Статистик кўрсаткичларни таҳлил қилиб айтиш мумкинки, португалиялик ўз ёши учун яхши спорт формасида ва бутун жамоа "унга ўйнаса", "шаҳарликлар" сафида ҳам мавсум давомида 20 - 25та гол ура олади. Албатта, Криштиану "Ман Сити"ни кучайтира олади, аммо жамоа устози бутун ўйинни португалиялик учун ўзгартирар, янгидан қурармикан?

Роналду ўйини ва Пеп Гвардиола футбол фалсафаси бир-бирига мос келадими?

Бу пунктни узоқ чўзиб ўтиришга ҳожат йўқ, жавоб яққол кўзга ташланиб турибди. "Манчестер Сити" мураббийи тўпга тотал эгалик қилишни маъқул кўради, бу эса рақибни жисмонан ҳолдан тойишига сабаб бўлади.

АПЛнинг фақатгина 2 ўйинида "шайхлар" тўпни ўртача 66,4% назорат қилдилар, бу борада жамоа "Брайтон" (64,1%) ва "Челси" (63,7%)ни ортда қолдириб, етакчилик қилмоқда. Криштиану турли услубларда ҳаракат қила оладиган футболчи, лекин АПЛда ўйнаганига қарамай, мослашув жараёни осон ўтмаслиги аниқ ва нафақа ёшига яқинлашган Роналду яна бир бор АПЛни "ёндира олармикан"?!

Португалияликнинг "Ман Сити"га шахсий муносабати

Роналду бир неча бор "Сити"га ўтмаслигини айтиб ўтган. Мисол учун, унинг 2009 йилда айтган сўзлари:

"Сити" янги жамоа қуришни ният қилган, яхши футболчиларни харид қилишмоқда, лекин энди бу менинг муаммойим эмас. Бу "Челси", "Ливерпуль", "Арсенал" ва "МЮ"нинг бош оғриғи. Мен энди бошқа чемпионатда тўп тепаман. Ҳозир мен мавсум стартига тайёргарлик ҳақида ва "Барселона", "Валенсия" ҳамда бошқа клубларга қарши курашга тайёр бўлишни ўйлашим лозим. "Ман Сити" нима қилаётгани мени қизиқтирмайди, ҳеч қачон ушбу жамоага ўтмайман".

Португалияликнинг 2011 йил айтган бошқа гаплари:

"Манчестер Сити" сафида тўп тепмасликка сўз бераман".

"Манчестер Сити"га эҳтимолий трансфери борасида 2013 йил Криштиану шундай деганди:

"Манчестер Юнайтед" эмас, "Манчестер Сити" сафида тўп тепиш? Мен бундай қилмайман. Нега? Чунки менинг юрагим "Манчестер Юнайтед"да.

2017 йил "Ювентус"га ўтишдан аввал "Олтин тўп" бешкарра соҳибининг фикри қуйидача эди:

"Манчестер Сити" мен учун 170 миллион евро таклиф қилганди? Ёмон эмас-а? Лекин бу жамоада тўп тепмасликка ваъда бераман".

"МС" устози билан ўзаро муносабатлар

Сўз навбати Гвардиоланинг Криштиануга ва аксинча йўналишдаги муносабатларга етгандек. Барчаси ўша тарихий "Эл-Класико"дан бошланган. Ўшанда "Барса" "Реал"ни йирик 5:0 ҳисобида таслим қилган, Криштиану Роналду эса ўша вақтда каталонияликлар устози бўлган Хосеп Гвардиолани туртиб юборган.

"Барселона" 2:0 ҳисобида олдинда ва "Реал" нокдаун ҳолатида эди. Тўп майдон чизиғини кесиб ўтиб, Гвардиоланинг қўлига бориб тушди. Роналду уни олиб, ўйинни давом эттирмоқчи эди, аммо мураббий тўпни ён томонга ташлаб юборди — бунга жавобан Роналду жахл устида рақиб мураббийини туртди. Хўш, Гвардиола Роналдунинг ўрнида исталган бошқа футболчи бўлса ҳам шундай қилармиди? Балки, йўқ. У "Реал"нинг асосий юлдузининг жахлини чиқариш ният қилган ва буни уддалаганди.

Эсда қоларли навбатдаги вазият "Олтин тўп" тақдирлаш маросимида Гвардиола барчанинг эътибор марказида Роналду "ташлаган бешини олмаганди". Ҳа, Пеп, биз Криштиану сенга ёқмаслигини тушуниб бўлганмиз!

Табиийки, португалияликнинг трансфери бутун дунёдаги мухлислар ичида ва футбол дунёсида катта шов-шувга сабаб бўлади. Бундан икки йилча аввал ПСЖ ва "Сити", Европда ўзининг кўпчиликка ёқмайдиган трансфер сиёсати билан, дунёнинг энг катта мухлислар аудиториясига эга икки футболчисини таркибига қўшиб олиши имконсиздек эди, аммо ҳозир Лео "Париж"да, "Олтин тўп"нинг беш карра соҳибининг "шаҳарликлар" сафига қўшилиши ҳақидаги миш-мишлар эса тобора ҳақиқатга яқинлашиб бормоқда.

Манчестернинг бошқа клубига ўтиш - бу сотқинликми?

Португалияликнинг бу қадами жуда қийиндек туюлсада, мабодо шундай бўлса, "МЮ" ва Сэр Алекс Фергюсон томон "тупуришдек" гап. Ваҳоланки айнан Ферги португалияликни катта футболга олиб кирган ва юлдуз бўлишига сабаб бўлган инсонлардан бири. Яна Роналдунинг "Манчестер Юнайтед"даги даврида айтган гапларини ёдга оламиз:

"Манчестер Юнайтед" менинг уйим. Юрагим ушбу клубга тегишли. Мен фақат шу ерда тўп тепишни истайман. Мураббий жамоага ишонади, мен ҳам. Манчестерда Фергюсон менга иккинчи отамдек бўлиб қолди".

Бошқа томондан Криштиануни тушунса бўлади, унинг маошини "кўтара оладиган" клублар бутун дунё бўйича саноқли. АҚШ ёки араб ўлкаларига боришни Роналду ҳамон рад этмоқда, бундай вазиятда фақатгина "Сити" варианти қолади. Аммо кеча "Манчестер Юнайтед" ҳам ишга аралашмоқчилиги ҳақида миш-мишлар пайдо бўлди. Буёғи янада қизиқ бўлади. 

Якун:

Роналдунинг "шаҳарликлар" сафига кўчиб ўтиши ўн йилча аввал фантастикадек туюларди, лекин ҳозир барчаси шунга қараб кетмоқда. Сабаби португалияликнинг ғалабага бўлган чанқоқлиги унга "Ювентус"да қолиб, фақатгина Италияда совринлар ютиб, тўпурар бўлиб юришга имкон қолдирмайди, Турин билан Чемпионлар Лигасида зафар қучиш "Реал"дагидек осон эмаслигини Криш тушунди чоғи. Ўз ёши учун ажойиб формада бўлган Роналду яна икки йил юқори даражани ушлаб қолиш ва Левандовский, Месси, Мбаппе ва Холланд билан "Олтин бутса" ва "Олтин тўп" учун курашишни исташи аниқ.

Бугун "Юве" устози Аллегри ҳам Роналду кетаётганини айтиб ўтди. "Сити" ва "Юве" босслари келишуви қандай бўлади билмаймизку, лекин балки айнан Роналду "шаҳарликлар"га орзуқиб кутилган Чемпионлар Лигаси бош совринини келтирар.

Демак, яна озгина кутсак етарли, Роналду Туринни тарк этиши аниқ, лекин унинг кейинги манзили қаер бўлади? Нима деб ўйлайсиз?!

Нозима Зарипова таржимаси