Расман: Вадим Афонин - "Локомотив" футболчиси!

Ўз вақтида "Шўртан" клуби ҳамда Ўзбекистон миллий терма жамоасидаги ўйинлари орқали мухлисларга танилган Вадим Афонин Россиядаги 7 йиллик фаолиятдан сўнг яна юртимизга қайтди. Эндиликда у "темирйўлчилар" шарафини ҳимоя қилади. 

Маълумот учун: 

Вадим Афонин

Туғилган санаси: 29.09.1987

Туғилган жойи: Тошкент шаҳри

Амплуаси: ярим ҳимоячи

Бўйи 180 см, вазни 74 кг. 

Футболчилик фаолияти: 

2005 – «Трактор»

2006-2008 – «Рубин» (Россия)

2009-2012 – «Шўртан»

2013 – «Салют» (Россия)

2014-2017 – «Оренбург» (Россия)

2017 – «Анжи» (Россия)

2018-2019 – «Оренбург» (Россия)

Вадим Афонин Ўзбекистон ёшлар ва олимпия терма жамоаларида бир нечта ўйинларда майдонга тушган, шунингдек 2012-2017 йиллар оралиғида Ўзбекистон миллий терма жамоасида ҳаракат қилган. 

Афонин Тошкентнинг собиқ "Трактор" жамоаси тарбияланувчиси ҳисобланади. Профессионал футболдаги фаолиятини 2005 йил шу клубда бошлаган. "Трактор" асосий таркибидан жой олган ярим ҳимоячи ўзининг ягона мавсумида 25та ўйинда майдонга тушган. 

2006 йил Афонин Россияга йўл олиб Қозоннинг "Рубин" клуби билан шартнома имзолайди ҳамда дастлаб ўринбосарлар сафида тўп тепади. "Рубин" асосий таркибида Россия Кубоги 1/16 финал босқичида "Смена"га қарши майдонга тушиб ўз дебютини тўлиқ ўтказган. 

Афонин 2009 йил Ўзбекистонга қайтиб "Шўртан" билан шартнома имзолайди ва 2012 йил охиригача ғузорликлар шарафини ҳимоя қилади. 2011 йил у "Шўртан" сафида ОФК Кубоги ўйинларида иштирок этганини кўпчилик яхши эсласа керак. Бундан ташқари "Шўртан"нинг ОФК Кубогидаги илк голи муаллифи ҳам айнан Вадим Афонин ҳисобланади.

Кейинчалик моҳир ярим ҳимоячи яна Россияга йўл олиб "Салют", "Анжи", "Оренбург" клубларида ҳаракат қилди.