Расман: "Ал Ҳилол"нинг яна 3 ўйинчисида коронавирус аниқланди, жамоада фақат битта дарвозабон қолди

Бугун қанот ҳимоячиси Ёсир Ал Шаҳронида вирус аниқлангани ҳақида хабар берган эдик.

"Ал Ҳилол" матбуот хизмати берган хабарга кўра, жамоанинг яна 3 нафар ўйинчисида Covid-19га топширилган тест натижалари ижобий чиққан. Улардан икки нафари дарвозабон: Абдуллоҳ Ал Жадани, Наваф Ал Ғамди ҳамда яна бири марказий ҳимоячи: Абдуллоҳ Ал Ҳафиз. Ал Ҳафиз "Пахтакор"га қарши 3 кун олдинги ўйинда тўлиқ ўйнаган эди. Ҳозирга келиб риёдликлар таркибида фақат бир нафар соппа-соғ дарвозабон қолди. Бу жамоанинг асосий кипери, Салмон Ал Фараждан кейинги сардор Абдуллоҳ Ал Муайуф.

17-рақамда ҳаракат қиладиган марказий ҳимоячи Абдуллоҳ Ал Ҳафиз.

Айни пайтга келиб "Ал Ҳилол"нинг жами 10 нафар футболчисида коронавирус аниқланди. Булар:

Дарвозабонлар: Муҳаммад Вакид, Абдуллоҳ Ал Жадани, Наваф Ал Ғамди.

Ҳимоячилар: Муҳаммад Ал Бурайк, Ёсир Ал Шаҳрони, Абдуллоҳ Ал Ҳафиз.

Ярим ҳимоячилар: Салмон Ал Фараж, Ҳамад Алабдан, Наваф Ал Обид.

Ҳужумчи: Салоҳ Шеҳри.

Эслатиб ўтамиз, иштирокчи жамоаларнинг барчаси кеча эрталаб навбатдаги бор Covid-19га тест топширишган эди.

4-турдан ўрин олган "Пахтакор" - "Ал Ҳилол" учрашуви маҳаллий вақт билан 21:00 (Тошкент вақти билан 23:00)да старт олади. Баҳс "Ал Жануб" стадионида бўлиб ўтади.