Қозоғистон футзал термаси устози Кака: "Бизда легионерлардан Игита билан Эдсон қолди"

Учрашувдан сўнг Қозоғистон футзал терма жамоаси бош мураббийи Кака фикрларини билдирди.

"Биринчи навбатда, Ўзбекистон футзал терма жамоасига бундай меҳмондорчилик учун раҳмат айтаман. Биз мана шундай нооодатий, чиройли аренада тўп тепишга муваффақ бўлдик, чунки юқори қисми очиладиган аренада ўйнаш кўпчиликнинг орзуси. Ўйин ҳақида тўхталсам, ҳа, биз ютқаздик, лекин биз бошимизни тик тутишимиз керак. Ҳаёт олдинда. Бу биз учун дарс бўлди, кўплаб ёшлар ҳаракат қилди. Янги авлод бундай ўйинлар орқали ўсишга эришади", – дейди Кака. 

- Таркибга эътибор берар эканмиз, 1 нафар бразилиялик футзалчи борлигига гувоҳ бўлдик. Қозоғистонда Жаҳон чемпионатида кўплаб бразияликлар бор эди. Янги тузилаётган жамоада уларнинг сони камроқ бўлиши қарор қилинганми?

- Дуглас ва бошқалар терма жамоамиз билан хайрлашди. Бизда Игита билан Эдсон қолди. Умид қиламанки, улар бизга ёрдам беришади. Ёшлар ўзидан ўзи ўсмайди. Бу натижа ёқимсиз, аммо биз бу босқичдан ўтишимиз керак. Янги уй учун албатта пойдевор зарур. Гап натижада эмас, ўйинда. Футзалчилар катта тажриба тўплаётгани хурсанд қилмоқда.

- Ўзбекистон чемпионатида бразилиялик футзалчилар кўпчиликни ташкил қилади. Мутахассис сифатида нима дея оласиз, легионерлар маҳаллий футболчиларга ёрдам бера оладими?

- Албатта. Қозоғистонда жорий йил легионерлар камроқ ва мазкур ҳолат ўйин даражасига ўз таъсирини кўрсатмоқда. Бошқа томондан бу ёшларга имконият. Фақат балансни топа олиш даркор. 

- Ўзбекистон футзали тарихидаги энг яхши ўйинчини айта оласизми?

- Жуда қийин. Лекин охирги йилларда кўрганимдан келиб чиқиб айтсак, Ҳусниддин Нишонов. У замонавий футзалчи, яхши зарбалар беради, кўп голлар уради. Ҳа, бутун тарихдаги энг яхшиси дея олмайман, чунки ўзбек футзали тарихи билан тўлиқ таниш эмасман.