"Қўқон-1912" Тошкентда машғулотларни бошлади. Йиғинга Осиё чемпиони қўшилди

Кеча жамоа аъзолари дастлабки машғулотларни ўтказишган эди. Бугун эса Бахтиёр Ашурматов шогирдлари икки маҳал машғулотларда иштирок этишди. Машғулотлар "Пахтакор" академиясига қарашли сунъий қопламали майдонда ҳамда "Бунёдкор" академиясининг табиий майдонларида бўлиб ўтмоқда.

"Шунқорлар"нинг бугунги машғулотларига янги футболчилар келиб қўшилган. Барча мухлисларимизга яхши таниш бўлган ҳужумчи, Осиё чемпиони Андрей Сидоров ҳамда ярим ҳимоячи Собит Синдаров Тошкентнинг "Пахтакор" жамоасидан келиб қўшилишган. Ҳозирча бу футболчилар жамоа кўригида бўлиб туришибди. Шунингдек ўтган мавсумнинг иккинчи қисмини Жиззахнинг "Сўғдиёна" жамоаси таркибида ўтказган Муҳаммаданас Ҳасанов ҳам ижара муддати якунига етгач, жамоа таркибига қайтиб келган.

"Қўқон-1912" жамоаси 9 январь куни Душанбенинг "Истиқлол" клубига қарши ўртоқлик ўйинида майдонга тушиши ҳақида хабар берган эдик. Яна иккита ўртоқлик ўйинлари учун спарринг рақиблар билан келишувга эришилди. Бу ҳақида кейинги хабарларимизда батафсил маълумот берамиз", - деб ёзади "Қўқон-1912" матбуот хизмати.

Маълумот учун, Андрей Сидоров ўтган мавсум "Бухоро" сафида 7та ўйинда майдонга тушиб, 1та гол урди.