“Қизилқум” мухлислари клуб раҳбарияти билан учрашди

Тадбирда клуб вакиллари ва мухлислар клуби аъзолари иштирок этишди.

Тадбир аввалида клуб ижрочи директори Ҳамиджон Актамов сўзга чиқди.

-Жамоамизнинг мавсум аввалидаги муваффақиятсизликлари учун сиз мухлислардан узр сўраймиз, -дея гап бошлади Ҳамиджон Ғуломович. – Мавсумни кутилгандек бошлай олмадик. Айрим ўйинларда омадимиз келмади. Шу боис барча мағлубиятда барча айбни ўз зиммамга оламан. Агар лозим бўлса, истеъфога чиқишга тайёрман.

Шундан сўнг мухлислар клуби аъзолари сўзга чиқиб, жамоанинг ҳозирги мураббийлар штаби ва футболчиларга ишонишларини, Ҳамиджон Актамов бир неча йиллардан буён Навоий футболини ривожланишига ҳисса қўшиб келаётганини таъкидлашди ва бир овоздан жамоа раҳбарининг истеъфосини рад этишди.

“Футболда ғалаба ва мағлубият ёнма-ён юради. Шу сабаб биз ҳар қандай вазиятда ҳам жамоамиз аъзолари – футболчилар ва мураббийларни қўллаб-қувватлаймиз. Ҳамиджон Актамов вилоятимизнинг фидойи фарзанди. “Қизилқум” жамоамизнинг кейинги йиллардаги муваффақиятларига катта ҳисса қўшиб келаётган инсон. Ўйлайманки, мавсум давомида футбочлиларимиз чиройли ўйинлар билан биз ишқибозларни хурсанд этишади”, деди “Қизилқум” мухлислар клуби раҳбари Шаҳриддин Ишназаров.