Қатардаги ходимимиздан эксклюзив: Роналду ўйиндан кейин ғалабани жамоадошлари билан нишонламади ва кийим алмаштириш хонасига йўл олди

ЖЧ-2022 1/8 финалида Португалия ТЖ 6:1 ҳисобида Швейцарияни тор-мор этди. Криштиану Роналду учрашувни захирадан бошлади ва 2-тайм ўрталарида Жоау Феликс ўрнига майдонга тушди.

Финал хуштаги чалинганидан кейин 37 ёшли форвард термадаги шериклари ва рақиблар билан қўл беришди. Кейин эса у мухлислар сектори томонга бориб, уларга миннатдорчилик билдирди ва тўғри ечиниш хонасига йўл олди. Аниқроғи, Криштиану ғалабани умумий жамоа аъзолари билан майдонда нишонламади, португалияликлар майдонда хурсандчилик қилаётган вақтда у кийим алмаштириш хонасида эди.

Эслатиб ўтамиз, Роналдунинг ўрнига асосий таркибда майдонга тушган Гонсалу Рамуш хет-трикка эришди. Криштиану эса 74-дақиқада захирадан ўйинга қўшилиб, 84-дақиқада гол урди, аммо офсайд туфайли унинг голи бекор қилинди.

Қатардан махсус: Толибжон Қосимов