Қатар ўзбекистонликларни кутиб олмоқда. Кеча ҳакамларимиз етиб келишди, бугун эса Кападзе жамоаси Доҳага келади

Ушбу мусобақа Олимпиадага йўлланма беради.

Кеча ана шу мусобақада фаолият олиб бориш учун Қатар пойтахти Доҳага етиб келдим. Бу сафар хизмат сафарим бироз бошқачароқ ўтади. Сабаби, мен бу гал ОФК учун расмий фотограф сифатида ишлайман. Кеча Доҳага Дубай орқали мусобақада ишловчи ўзбекистонлик ҳакамлар билан бирга келдим. Демак, U-23 Осиё кубогида Ўзбекистондан Владислав Цейтлин (ҳакамлар назоратчиси), Рустам Лутфуллин (бош ҳакам), Санжар Шоюсупов, Алишер Усмонов (иккиси ёрдамчи ҳакам) ва Фирдавс Норсафаров (ВАР ҳаками)лар фаолият олиб боришади. ОФК делегацияси ва ҳакамлар "Шератон" (Sheraton Grand Doha Resort) меҳмонхонасига жойлашишган.

Тимур Кападзе бошчилигидаги олимпия терма жамоамиз эса Доҳага бугун Қатар вақти билан 16:05 (Тошкент вақти билан 18:05)да етиб келишади. Ўзбекистон U-23 терма жамоаси мусобақа давомида "City Centre Rotana Doha" меҳмонхонасида истиқомат қилишади. Бу меҳмонхонага шунингдек Хитой U-23 терма жамоаси ҳам жойлашади.

Ўзбекистон U-23 терма жамоасининг гуруҳ босқичидаги тақвими:

U-23 Осиё кубоги

"D" гуруҳи, 1-тур

17.04.2024, 16:00 (Тошкент вақти билан 18:00).

Ўзбекистон - Малайзия

"Халифа Интернешнл стэдиум"

"D" гуруҳи, 2-тур

20.04.2024, 18:30 (Тош. вақти билан 20:30).

Кувайт - Ўзбекистон

"Ал Жануб" стадиони

"D" гуруҳи, 3-тур

23.04.2024, 18:30 (Тош. вақти билан 20:30).

Ўзбекистон - Вьетнам

"Халифа Интернешнл стэдиум"

Championat.asia ўқувчилари учун мусобақани ёритиш мақсадида эса Жаҳонгир Файзуллаев ҳамда Абдулвосит Бектемиров 16 апрель куни Доҳага етиб келишади. Мусобақада фаолият олиб борадиган барча ўзбекистонликларга омад ва зафар ёр бўлишини тилаб қоламиз. Футболчиларимиз Олимпиада йўлланмаси билан, ҳакамларимиз ижобий баҳолар билан, биз эса яхши кадрлар билан ортга қайтайлик. Омад сиз ва бизни асло тарк этмасин!

U-23 Осиё кубогининг барча гуруҳлари.