ПСЖ - "Ливерпуль" учрашуви ҳақида

Бугун ЕЧЛ 5 тури доирасида мухлислар ПСЖ-"Ливерпуль" ўртасидаги тўқнашувга гувоҳ бўлишади. Сўнгги марта, бу икки клуб сентябрь ойида "Энфильд"да белашишган ва мерсисайдликлар драматик ўйинда ғалаба қозонишган эди.

ПСЖ-"Ливерпул" ўйини қачон бўлиб ўтади?

Мусобақа: УЕФА Чемпионлар Лигаси, 5 тур
Учрашув қаерда ўтказилади: "Парк де Пренс"
Қачон: Пайшанба, 29 ноябрь 01:00 (Тошкент вақти билан)
Қайси каналда намойиш этилади: Футбол ТВ, Матч ТВ

Ўйин превьюси

ЕЧЛ С гуруҳида 4 тур ортда қолган бир пайтда барча жамоаларда имконият сақланиб турибди. "Ливерпуль" ва "Наполи" 6 очко билан гуруҳда пешқдамлик қилишаётган бўлса, парижликлар ҳисобида 5 очко бор. Сербиянинг "Црвена Звезда" клуби ушбу "ўлим гуруҳи"да 4 очко жамғаришга эришгани тақсинга лойиқ. Умуман, мазкур турдан сўнг, кўп нарсага ойдинлик киритилади.

Неймар, Кавани, Мбаппе "трио"сининг Салоҳ, Фирминьо, Мане учлигига қарши қандай ҳаракат қилиши барчанинг эътибор марказида бўлади. Парижликлар Лига 1 да истаган ишларини қилишмоқда. Лекин, ЕЧЛда вазият бироз чигаллашган. Клопп жамоаси камдан-кам ҳолларда ҳимояга таянади. Шунинг учун, бугун фақат ва фақат ҳужумкор ўйин кўрсак ажаб эмас.

Томонларнинг ўзаро тўқнашувида тенгликни кўришимиз мумкин. Иккала клуб ҳам 6 мартадан ғалаба қозонишган ва 4 учрашувда ғолиб номи аниқланмаган.

Йўқотишлар

ПСЖ учун асосий янгилик - бу шубҳасиз Неймар ва Мбаппенинг жароҳатдан фориғ бўла олишгани. Томас Туҳел ўйин олди матбуот анжуманида иккала шогирди учрашувга тайёр экани ва асосий таркибда ўйинни бошлашларини мамунуният билан тасдиқлади.

Ливерпульнинг Парижга келган футболчиларидан фақатгина Садио Маненинг соғлигида бироз хавотир бор. Бироқ, сенегаллик вингер сешанба кунги машғулотларда ўзини яхши ҳис этди ва катта эҳтимол билан у ҳам Клоппнинг асосий таркибидан ўрин олади. Адам Лаллана, Доминике Соланке, Натаниэль Клайн, Дивок Ориги сингари футболчилар жароҳатлар сабабли Францияга боришмади.

Таҳминий таркиблар

ПСЖ: Буффон, Маркиньос, Силва, Кимпембе, Менье, Веррати, Ди Мария, Бернат, Мбаппе, Неймар, Кавани.
Ливерпуль: Алиссон, Арнольд, Ловрен, Ван Дейк, Робертсон, Хендерсон, Вейналдум, Милнер, Фирмино, Мане, Салох.

Таҳминий ҳисоб - 2:2

Нодир Абдурасулов тайёрлади