"Пахтакор" янги мавсумга тайёргарликни давом эттирмоқда: Суюнов сафга қайтган ФОТО

Жамоа аъзолари 3 январь куни тўпланишди ва даставвал тиббий кўрикдан ўтишди. Сўнгра жамоа аъзолари жисмоний тайёргарлик бўйича мутахассис Ласло Ямбор қўл остида чигалёзди машғулотларини олиб боришди.

Дастлабки кунги машғулотларга легионерлардан Марко Симич, Драган Черан келиб қўшилишди. Шартномаси тугаган Тиаго Безерра эса ҳозирча жамоа лагерига қўшилгани йўқ. Томонлар ҳали янги битимга имзо чекишгани йўқ. Суперлига тўпурарининг келаси мавсумни қаерда ўтказиши ҳозирча тўлиқ ҳал этилмаган. Тез орада томонлар музокара ўтказиш учун стол атрофига ўтиришлари кутилмоқда. Исмоил Гонсалвеш эса бугундан машғулотларга қўшилиши кутилмоқда.

"Пахтакор"ни янги мавсум олдидан баъзи легионерлар тарк этиш эҳтимоли юқори. Чунки клуб раҳбарияти жамоага янги легионер олиб келиш тараддудида. Айни пайтда "Пахтакор" янги легионер футболчи билан музокаралар ўтказмоқда.

Машғулотларга янгилардан ўтган мавсумни "Бунёдкор"да ўтказган ва "шерлар"нинг янги аъзосига айланган Акром Комилов иштирок этмоқда.

Қўлининг панжасини синдириб олган Элдорбек Суюнов умумий гуруҳда ҳам, дарвозабонлар машғулотларида ҳам бемалол тўп билан ишламоқда.

Кичик жароҳат олган Александр Лобанов биринчи кун машғулотларида иштирок этмади.

Ижарадан қайтган футболчилар, хусусан Ботирали Эргашев ҳам "Пахтакор" лагерида шуғулланмоқда. Яқинда жарроҳлик столига ётқизилган дарвозабон умумий гуруҳ машғулотларига январь ойи сўнггида қайтиши кутилмоқда. Кипер ҳозирча индивидуал машғулотлар ўтказмоқда.

"Пахтакор"нинг кечаги машғулотидан фотогалереяни сайтимизнинг махсус бўлими орқали томоша қилишингиз мумкин. >>>>> ФОТОГАЛЕРЕЯ