"Пахтакор" - "Бунёдкор". Жепаров, Мурзоев ва Абдураимов дербидан олдин қандай фикрда?

Турнинг марказий ўйинига қизиқиш катта бўлиши табиий. "Пахтакор" Жиззахдаги мағлубият ўрнини тўлдириш учун ҳам икки ҳисса куч билан ҳаракат қилади. "Шерлар" мағлубият тасодиф эканлигини исботлаш учун ҳам эртага фақат ғалаба учун майдонга тушишади. Уларни бошқа натижа қониқтирмаслиги аниқ. Вадим Абрамов қўл остидаги жамоада ҳозирча барчаси жойида дейишга эрта. "Қўқон-1912" билан баҳсда кўрдикки, "қалдирғочлар" уюштирилаётган ҳужумларга якуний нуқтани қўйишда оқсашмоқда. Хуллас, гапирса гап кўп. Бу борада ўз вақтида маҳоратли футболчи бўлган, бугунги кунда футболимизда тажрибали мутахассис сифатида тилга олинаётган Азамат Абдураимов, Камолиддин Мурзоев ва Сервер Жепаровларнинг дерби олдидан билдирган таҳмин ва фикрларига қулоқ тутамиз.

"Эртанги дерби кутилганидан қизиқарли кечишини таҳмин қиляпман. Айниқса, "Пахтакор" Жиззахдаги кутилмаган мағлубият сабабли икки баробар мотивация билан ўйнайди. "Бунёдкор" энг яқин рақобатчиси билан 6 очколик ўйинда ғалаба қозониб совринли ўринлар учун катта қадам ташлаши мумкин. "Суғдиёна"нинг сенсацияси жамоаларнинг мавқеи ва эгаллаб турган ўрнидан келиб чиқиб айтилган гап.   Аслида ўша куни Улуғбек Бақоев шогирдлари барчанинг имкониятлари тенг эканлигини кўрсата олди.Карантиндан сўнг деярли барча жамоалар бир хил даражага тушди. Эртага кимда хоҳиш кучли бўлса ва ҳаракат қилса ўша жамоа ғалаба қозонади. Дербиларда футболчилар кучни тежаб ўйнамайди, борини беради. Арвеладзе ва Абрамовнинг ўзига яраша қарашлари бор. Икки мутахассис ҳам ҳужумкорликни яхши кўради. Бир-бирига атаб қўйган яширин совғалари бўлиши ҳам мумкин",- дейди Камолиддин Мурзоев.

"Қисқача фикр билдиришим мумкин. Ҳозирда Суперлига жамоалари оптимал спорт формасида эмас. Тошкент дербисида фаворит кўрамаяпман. Икки жамоанинг имкониятлари тенг",- дейди Сервер Жепаров.

"Аслида ўтган турда икки жамоа ҳам дуранг натижа қайд этишлари мантиққа тўғри келарди. "Бунёдкор"га омад кулиб боқди. "Пахтакор"га эса сафардан бир очко билан қайтишига ҳакамлар тўсқинлик қилди. Улар иккита яққол пенальтини белгиламадилар. "Пахтакор" доскада рақибини мағлуб этиб бўлганди. Лекин, майдонда "Суғдиёна" футболчиларида хоҳиш устунлик қилди. Биргина Жалолиддин Машариповнинг рақиб ҳимоясини ёриб ўтишга уринишлари самара бермади. Дарвоқе, футболчилар узоқ танаффусдан сўнг ўйин ритмидан чиқиб кетганини айтиш жоиз. Бўлажак учрашув ҳақида гапирадиган бўлсам,"Пахтакор" ва "Бунёдкор" ўртасидаги беллашувлар доим муросасиз ва кескинлиги билан ажралиб турган. Бу сафар икки жамоанинг очколари бир хил, турнир жадвалида ёнма-ён кетишмоқда. Таркиб ва ўйинни ташкил қилиш жиҳатдан "шерлар" фаворит. Арвеладзенинг захира ўриндиғи Абрамовникидан кучлироқ. Садриддин Абдуллаев, Жавоҳир Сидиқовларнинг қайтгани ҳам мезбонларнинг фойдасига ишлаши турган гап. Ҳужум чизиғида ўзгаришлар кўришимиз эҳтимоли йўқ эмас. Ўзимни қадрдон жамоам "Пахтакор" ушбу баҳсда уч очкони қўлга киритади",- дейди Азамат Абдураимов.