Осиё ўйинларига 19 кун қолди, чемпион бўла оламизми? Ҳа!

Ўйинида ўсиш юқори. Барча футболчилар аллақачон ўз клубларининг етакчиларига айланиб бўлдилар. Оддий мисол, Сардор Рашидовни ҳеч иккиланмасдан олий лигамизнинг энг кучли уч футболчиси қаторида кўрсата оламан. Бу таркиб менга 2011 йили Осиё Кубогида қатнашган терма жамоамизни эслатяпти. Ўша йили ёдингизда бўлса, ҳамма футболчиларимизнинг "пишган" пайти эди. Аҳмедов, Исмоилов, Муллажонов, Ҳайдаров, Турсунов ва Андреев каби футболчилар 25га тўлиб улгурмагандилар.

Бу таркибдаги биргина муаммо ҳужум чизиғида. Ҳимоя ва ярим ҳимоя идеал ҳолатда. Миржалол Қўшоқович Фарҳод Тожиев ва Ислом Тўхтахўжаев каби МТЖ футболчиларининг хизматидан фойдаланиш ниятида эканлигини инобатга олсак, терма жамоамиздан фақат ва фақат ғалаба кутишга ҳақли бўламиз. Аслида биз ҳам бошқалар каби бу турнирда олимпия терма жамоаси аъзоларини синаб кўришни маъқул кўраётгандик, аммо Миллий Олимпия қўмитасида кузатилаётган бугунги ижобий ўзгаришлар натижасида бу турнирга жиддий аҳамият бериш керак деган қарорга келинди ва 20 йил аввал қайд этилган натижани такрорлаш кераклиги асосий вазифа қилиб олинди.

Ҳар қандай турнир, у қандай савияга эга бўлмасин мамлакат футболини бир қадам олдинга ташланишига сабаб бўлиши аниқ. Тебса тебранмас даражага келиб қолган олий лигамизга мана шундай йирик ғалабалар етишмаяпти. Футболчилар ҳам худдики кун ўтиши учун ўйнаб юргандек гўёки. Европадан фарқли равишда бизда бир футболчи 2-3та ёшдаги терма жамоаларда ўйнаб юраверади. Мураббийлар селекция ишларига жуда суст қарашяпти. Бу жамоани шакллантириш орқали эса миллий терма жамоага кириш орзусида бўлган футболчилар учун катта эшикни очиш дегани. Менимча ҳар бир мусобақага фақат ўз ёшидагиларнинг хизматидан фойдаланиш пайти келди. Мана йиллар давомида Аббос Махситалиевни бир терма жамоадан иккинчисига, иккинчисидан учинчисига олиб ўтавериб битта истеъдоднинг бошига етиб бўлдик. Бу ерда айбни "Пахтакор"га тўнкаётганлар адашишади, Аббос бир кун у терма жамоада юрган бўлса, эртаси кун янгисига кетавериб клуб учун қароргоҳида деярли бўлмай қолганди. Ҳеч эътибор берганмисиз, нима учун ёшлар ва ўсмирлар терма жамоасида порлаганлар кейин йўқ бўляпти-ю, ўз пайтида терма жамоага чақирилмаганлар кейинчалик олий лигада ўз ўринларига эга бўлмоқда? Негаки бизда тизим нотўғри йўлга қўйилган. Ҳадеб турли ёшдаги йиғинлар, узоқ сафарлар ўтказилади ва футболчи клубидан узилиб қолаверади. Аксинча терма жамоа мураббийи назаридан четда қолган фубтолчи кейинчалик ўз клубининг асосий таркибидан муқим жой олади. Чунки у доимий равишда клуби тизимида ўзини шакллантириб бораверади. Йиғинлар керак, аммо олий лига қизиган ва футболчи ўз клубига керак пайтда эмас. Мақсад МТЖ йўлида бирлашиш бўлса, аввал клубларда футболчиларни асосий таркибда ўйнатишга эришишимиз керак.

Энди бевосита мусобақага қайтамиз. Осиё ўйинлари на ФИФА, на ОФК тасарруфида эмас. Шунинг учун бу мусобақада ҳамма терма жамоа ҳам асосий таркибини юбормайди. Асосан бир йил кейин бошланадиган Олимпиада саралаш ўйинларига тайёргарлик сифатида қараладиган мусобақа. Гапимнинг исботи сифатида 2010 йил бўлиб ўтган Осиё ўйинлари рақамларига мурожаат қилсам.

2010 йилги мусобақада 1987 йилда таваллуд топган футболчилар қатнашиши лозим эди. Чемпионликни қўлга киритган Япония ёшларининг таркибидаги 10 нафар футболчи 1990 йилда туғилган. Бугун миллий терма жамоада тўп тепаётган, 1990 йилда таваллуд топган Хотару Ямагучи ва Масато Кудо Осиё ўйинларида чемпионликни тантана қилган эдилар. Иккинчи ўрин соҳиби БАА терма жамоаси сафида ҳам асосан 1990 йилда таваллуд топган футболчилар ўйин қилган эдилар. Муҳамад Файзи, Аҳмад Али, Теяб Авана. Аҳмад Халил ва Омар Абдулраҳмон 1991 йилда туғилган. Агар бу икки футболчи яна бир неча кундан кейин бошланадиган мусобақада иштирок этадиган бўлсалар, шубҳасиз БАА яна чемпионлик учун кураш олиб боради.
 
Турнирда бронза медалларини қўлга киритган Кореягина бироз лимитдан фойдаланган. 1982 йилда таваллуд топган Ким Жунг Ву ҳарбий хизмат вазифасини ўтаётганлиги учун терма жамоада ўйнаганди. Ёши катталардан 1985 йлда туғилган Парк Чу Ёнг иштирок этган. Бир йил ўтиб Осиё Кубоги тўпурари бўлган Ку Жа Чеол ҳам Осиё ўйинларида тўп тепган эди. Бу сафарги турнирнинг асосий фоворити айнан мезбонлар бўлади. Улар учун ўз майдонларида бўлиб ўтадиган мусобақага футболчиларни жалб этиш муаммо туғдирмайди. Кореяликларнинг ўзлари эса асосий рақиб сифатида бизни кўрсатишмоқда.

Энди қуръа натижаларига эътибор қаратамиз. Қуръада бизга омад кулиб боқди. Ўзбекистон - Афғонистон нафақат бизни, балки бутун дунёни ўзига жалб этса ажаб эмас. Жуда кўпчиликда Афғонистон футболи ҳақида тушунча йўқ. Мен яқинда уларнинг чемпионати билан қизиққандим. Чемпионати кучсиз, аммо мухлис тўплаш ва тарғибот бўйича бизникилардан анча устун. Афғонистон премьер-лигасининг расмий сайти барча ўйиларни бекаму кўст ёритиб боради. Ҳар бир тур ўйинларининг видеоси сайтдан жой олади. Кучлилар сафида иштирок этадиган 8 жамоанинг барча футболчилари ҳақида маълумот олишингиз мумкин.

Гуруҳдаги асосий рақиб Гонконг бўлса керак. Бангладешдан осонликча ўта оламиз. Аслида гуруҳдаги рақибларимизнинг кучсизлиги бизнинг фойдамизга. Жамоа 1/4 финалга катта кучни сарфламаган ҳолда чиқади. Чунки 1/4 финалдаги рақиб биз учун жиддий. Ё Саудия Арабистони ё Жанубий Корея бўлади. Жанубий Корея ҳам бизга қарши тушишни истамаслиги аниқ. Бундай ҳолатда икки терма жамоа ҳам гуруҳда биринчи ўринни қўлга киритишлари керак бўлади. Шундагина финалга қадар ўзаро учрашмайдилар. Лекин бизнинг “душман” ўзимиз эканлигини ҳам унутмаслигимиз лозим. Оғзимиздаги ошни бировларга бир неча марта олдириб бўлдик. Гуруҳда биринчи ўринни қўлга киритадиган бўлсак, футболчиларимиз руҳан кейинги ўйинларга тайёр бўлишлари керак бўлади. Энг қийини аслида шу. Битта ғалабадан кейин талтайиб кетишимиз керак эмас. Фақат ва фақат финалда ҳакамнинг якуний ҳуштаги янграганидан кейингина бўшашиш мумкин, холос.

Ҳозирча Саудия Арабистони термаси Туркияда йиғин ўтказганлиги тўғрисида хабар бор. Катта эҳтимол билан айнан “А” ёки “B” гуруҳи вакиллари чемпионликни тантана қилса керак. Шу кунгача бу мусобақа олимпия терма жамоамиз учун машғулот вазифасини бажариб келган бўлса, бу сафар Австралияда бўлиб ўтадиган Осиё Кубогига репитиция бўлади. Шу таркибга нари борса яна 5 нафар футболчини қўшсак МТЖ ҳосил бўлади.

П.С: Яна бир қувончли хабарни Сизга етказишни истардик, Инчонда бўлиб ўтадиган Осиё ўйинларида иштирок этиш ҳуқуқини берадиган ҳужжатни қўлга киритдик. Шундай экан, мусобақа давомида сайтимиз сизларни зериктириб қўймайди, ундан ташқари ҳозиргина БАА визасини ҳам қўлга киритдик. Кореядан келибоқ БААга учамиз ва Ўзбекистон МТЖни Осиё Кубоги олдидан ўтказадиган иккита ўртоқлик учрашувида иштирок этамиз. Ҳомийларни бўлса марҳамат!.

Нодирхўжа Юлдашев