ОЛИЙ ЛИГА. "Андижон" сафарда ўзини кўрсата оладими?

Тошкентнинг "Бунёдкор" клуби ўз майдонида "Андижон"ни қабул қилади.

Олий лига, 13-тур. 20 июнь
БУНЁДКОР - АНДИЖОН

Бошланиш вақти: 19:00
Бош ҳакам: Наим Қосимов (Қарши)

Турнир жадвалидаги ўрни: "Бунёдкор" 2-ўринда (30 очко), "Андижон" 14-ўринда (9 очко).
Очколар орасидаги фарқ - 21 очко.

Таъриф: Чемпионлик учун курашаётган ва олий лигада қолиш учун ҳаракат қилаётган жамоалар баҳси. Бу ўйинда шубҳасиз майдон эгаларининг имконияти юқори баҳоланмоқда. Аввалги турда "Металлург" билан дуранг ўйнаган "Бунёдкор" бу сафар ўз майдонида "Андижон"ни мағлуб этишга уриниб кўради. "Андижон" сафарда жиддий қаршилик кўрсата оладими? Буни эса албатта вақт ва ўйин кўрсатади.

Факт: "Бунёдкор" Тошкентдаги баҳсларда ҳали мағлуб бўлгани йўқ, "Андижон" эса сафарда ғалаба қозона олмаяпти. "Андижон" шу пайтгача сафарда 6та ўйин ўтказиб, шундан ҳаммасида мағлуб бўлди. Жамоа учта ғалабани фақат уйдаги беллашувларда қўлга киритган.

Биласизми? "Андижон" сафар ўйинларида ҳозирча бешта гол урган. "Бунёдкор" эса ўз уйидаги учрашувларда 14 марта тўп киритишнинг уддасидан чиқиб, атиги иккита гол ўтказиб юборган.

Эслатма: Кеча бўлиб ўтган "Бунёдкор" - "Андижон" (Ёшлар лигаси) баҳсида "бунёдкорчилар" 2:1 ҳисобида зафар қучишди.