ЎФА президенти Абдусалом Азизов МТЖ бош мураббийи Сречко Катанец билан учрашди

Мураббийлар кенгаши ҳамда мутахассислар таҳлил ва тавсиясига кўра словениялик тажрибали мураббий Сречко Катанец номзоди маъқул деб топилди.

ЎФА раҳбари Сречко Катанец бошчилигидаги Миллий терма жамоамиз мураббийлар штабига Ўзбек халқининг азалий орзуси ҳисобланган Жаҳон чемпионати йўлланмасини қўлга киритиш вазифасини қўйди. Бу йўлда келажакни кўзлаб, ёш, истеъдодли, курашувчан ва ватанпарвар футболчилардан иборат рақобатбардош таркибни шакллантириш зарур эканлигини аълоҳида таъкидлади. 

Ўз навбатида, Сречко Катанец ишонч ва имконият учун ЎФА раҳбариятига миннатдорчилик билдирди ҳамда бор билим ва тажрибасини ишга солган ҳолда ҳар бир ўйинда жамоани фақатгина ғалаба томон етаклашини айтиб ўтди.

Маълумот ўрнида, бугун Сречко Катанецнинг Ўзбекистон футбол ассоциацияси билан шартнома имзолаш маросими бўлиб ўтди. Шартномага кўра, словениялик мутахассис 2025 йилга қадар Ўзбекистон миллий терма жамоаси бош мураббийи сифатида фаолият юритади.