Одил Аҳмедов: "Хитойга ўтиш ортга ташланган қадам эмас"

"Менда Хитой клублари билан бирга, Европадан ҳам таклифлар бор эди. Бироқ, барчасини ўйлаб кўрдим ва шу қарорга келдим. Сабаби Хитойга ўтиш "Краснодар"га максимал фойда келтирарди. Хитой чемпионатига ўтиш ортга ташланган қадам деб ўйламайман, сабаби ҳозир бу чемпионатда жаҳоннинг энг кучли футболчилари ўйнашмоқда ва энг кучли мураббийлари ишлашмоқда. Қарор қабул қилишдан олдин Виллаш-Боаш билан гаплашиб олдим. У жамоадаги вазият ҳақида гапирди, менинг жамоадаги ролимни айтиб берди, шундан кейин ўтишга қарор қилдим", - дейди Аҳмедов.

"Менинг трансферим терма жамоага фойдали бўлади, сабаби мени терма жамоа устозлари кузатиб боришади", - дейди футболчи.

"Афсуски, жамоа билан хайрлаша олмадим, сабаби таътил бошланиши билан учиб кетгандим. Шартномага қўл қўйишдан олдин Сергей Галицкийга қўнғироқ қилдим, бир биримизга омад тиладик. Сергей Николаевич каби инсонлар Россия футболига жуда керак, сабаби у мамлакат футболига кўп ишлар қилмоқда. Унга жамоа билан бирга Россия чемпиони бўлишини тилайман, зеро у бунга ҳақли", - дейди Аҳмедов.

Аҳмедов "Краснодар"га 2014 йилда "Анжи"дан кўчиб ўтганди. Бу клуб сафида ҳамюртимиз 101та ўйинда майдонга тушиб 7та гол урди ва 13та голли пас оширди. Клуб таркибида Россия чемпионати бронза медали соҳибига айланди ва Россия Кубоги финалига чиқди. 2014/15 йилги мавсумда "Краснодар"нинг энг яхши футболчиси деб топилган эди.