Одил Аҳмедов: "Ўзбекистон нима учун ҳамма шароитлари ва ажойиб майдони бор "Пахтакор" стадионида ўйнамайди, тушунмайман"

Учрашувдан сўнг терма жамоамиз сардори Одил Аҳмедовни суҳбатга чорладик.

"Ғалаба қозонамиз деб майдонга чиққан эдик. Биринчи бўлимда бироз эҳтиёткор бўлиб ҳаракат қилдик ва ҳимояга эътибор қаратдик. Иккинчи бўлимда эса Қатар ҳам ҳудди биз каби олдинга ўтди ва айни шу сабаб биз учун ҳужумда зоналар пайдо бўлди", - дея Аҳмедов ўйинга умумий фикрини билдирди.

- Бугун ҳам КХДРга қарши бўлгани каби майдон чими эркин ҳаракат қилишга ҳалал берди, бу борада нима дея оласиз?
- Ҳа, бу нарса таъсир ўтказади. Ташқаридан унчалик билинмаслиги мумкин, лекин майдонга тушиб ўйнаб кўрган одамга бу нарса дарҳол билинади. Ҳар бир жамоа қайси майдонда ўйнашини танлаши керак. Бу Ўзбекистон миллий терма жамоаси-ку ахир. Нима учун ҳамма шароитлари ва ажойиб майдони бор "Пахтакор" стадионида ўйналмайди, очиғи, тушунмайман. Бу ерда чим яхши эмас.

- Шунга қарамай, бугун самарадорлик кўрсатдингиз.
- Бу футбол, унда доим гол ураман ёки голли пас бераман деб майдонга чиқамиз. Аллохга шукр, бугун ўйиним қовушди ва гол уриб, ҳам голли пас бердим.

- Эктор Купер айни пайтда ҳимояни тартибга келтириб олишга кўпроқ урғу бермоқда. Бош мураббий танлаган тактика ва услуб ўйинчи ва жамоа сардори сифатида сизга маъқул келаяптими?
- Мураббий қандай тактика танлашидан қатъи назар жамоа учун энг керакли нарса - натижа. Танланган услуб натижа берса, демак биз тўғри йўлда бўламиз.

- Мураббий сиз билан сардор сифатида жамоанинг келажакдаги ҳаракатлари ҳақида юзма-юз гаплашдими?
- Бундай мавзуда гаплашганимиз йўқ.


Толибжон Қосимов суҳбатлашди