ОЧЛ. Ярим финал. Кўзгуда – “ФК Сеул” (Ж.Корея)

Жанубий Кореянинг амалдаги чемпиони “Сеул” йилдан йилга кучайиб боряпти. Агар жамоа Эроннинг “Истиқлол” клубидан устун келса, финал йўлланмасини қўлга киритади. Корейслар аввалги босқичда Саудиянинг “Ал Аҳли” клубини мусобақадан чиқариб юборишди.

“Ярим финалда иштирок этиш “Сеул” учун тарихий натижа, - дейди жамоа бош мураббийи Чой Ёнг Су. – Дастлабки баҳсни ўз майдонимизда ўтказаётганимиз боис нима қилиб бўлса-да ютишимиз шарт. Йўқса, Теҳронда бизга нақадар қийин бўлишини тасаввур қиляпман. Бизда жароҳат олганлар ҳам, ўйинни ўтказиб юборадиганлар ҳам йўқ. Бир сўз билан айтганда, ҳамма тайёр. Ўйинчилар ҳам, мен ҳам эътиборни фақат ўйинга қаратмоқчимиз. ”

Таниқли футболчи Ча Ду Ри эса учрашувдан олдин қуйидаги фикрларни билдирди:

“Эронликларга қарши неча марта майдонга тушган бўлсам, бирорта учрашув осон кечганини эслай олмайман. Улар курашни ёқтиришади, биз эса тезкор футболни. Барчамиз навбатдаги беллашувга жиддий ҳозирлик кўрдик. Финалга чиқиш учун бор кучни ишга соламиз”.

Хайрулла Холиқов тайёрлади.