ОЧЛ олдидан. "Насаф" учинчи марта ўзида Эрон клубини қабул қилади

Бугун Қаршида "Насаф"ни жуда муҳим баҳс кутиб турибди. Негаки жамоа ўз майдонида Эроннинг энг номдор клубларидан бири "Персеполис"ни қабул қилади. Эсингизда бўлса, Теҳронда кечган ўйинда "Насаф" 0:3 ҳисобида ютқазиб қўйганди. Бугун қаршиликлар ўша мағлубият аламини олишга ҳаракат қилиб кўришади.

ОЧЛ. "С" гуруҳи. 5-тур. 2 апрель
19:30. "Насаф" - "Персеполис"
21:00. "Ал Садд" - "Ал Васл"

Гуруҳдаги вазият: "Ал Садд" ва "Персеполис" ҳисобида 9 очкодан бор ва биринчи-иккинчи ўринларни эгаллаб туришибди. "Насаф" 6 очко билан учинчи ўринда бораётган бўлса, БААнинг "Ал Васл" клуби барча ўйинларда мағлубиятга учраши натижасида 0 очко билан охирги ўринда турибди.

Биласизми? Бугун "Насаф" ўз тарихида учинчи марта ОЧЛда Эрон клубини қабул қилади. Қаршиликлар илк бор 2012 йил Теҳроннинг "Истиқлол" клуби билан ўйнаб 0:2 ҳисобида имкониятни бой беришган. 2015 йил "Тракторсози"га қарши ўтказилган беллашувда эса "2:1 ҳисобида "Насаф"нинг қўли баланд келган. Ўшанда Илҳом Шомуродов ва Ҳамза Каримовнинг голи майдон эгаларига ғалаба келтирганди.

Бугун шунингдек, "D" гуруҳида ҳам баҳслар давом эттирилади. "Ал Айн" ўз майдонида "Ал Ҳилол"ни қабул қилса, "Истиқлол" "Озоди" стадионида "Ал Райан"га қарши майдонга тушади. Ҳар иккала учрашув 20:30да бошланади.