Нигора Абидовадан Евро-2016 таҳлили

Исландия ва Уэльсни оригинал тарзда мақтамоқчи эмасман. Бу икки терма жамоа 2015 йил декабрь ойидаги қуръа ташлаш жараниёда финалчилар орасида энг паст коэффициентли жамоалар эди: 25,388 ва 24,521. Улардан кейин Албания ва Шимолий Ирландия қайд этилганди.

Европа чемпионатидан олдин Исландия деганда кўз олдимизга фақат вулқонлар ва болта кўтарган викинглар келарди. Мен учун ва кўпчилик учун бу жамоа ғалабага бўлган ирода, интилиш намунаси бўлди. Турли тахминлар, фикрларга терс ўлароқ гуруҳдан чиқишга эришишди. Францияга мамлакат аҳолисининг 10 фоизи ташриф буюрди ва бутун дунёга қандай қилиб мухлислик қилиш кераклигини кўрсатиб қўйишди. Исландиялик мухлислар томонидан ижро этилган ўзига хос "Viking Clap" ёки "HUK" ҳақида энди саёрамизнинг деярли барча мухлислари билишади. Франциядан учралган йирик ҳисобдаги мағлубиятдан кейин ҳам исландлар ўз футболчиларини айнан шундай тарзда кузатиб қўйгани одамни таъсирлантирмай қўймайди.

Уэльс терма жамоаси бундай мухлислар билан мақтана олмас, лекин уларда Бэйл ва Рэмзи бор, иккала футболчи жамоани ярим финалга олиб чиқди, бу босқичга Испания, Италия, Англия, Бельгия каби фаворитлар етиб кела олишмади...

Дель Боске бошчилигидаги испанлар мени хафа қилишди. Муаммолар барчага маълум эди, ўйин услубини ўзгартириш керак. Таркиб яхши. ЖЧ-2018га қадар ёш футболчилар тажриба тўплаб олишади.

Энг ёрқин ўйин сифатида Италия ва Германия ўртасидаги баҳс ёдимда қолди: Европанинг иккита гиганти, икки буюк дарвозабон, мен кўрган энг дахшатли пенальтилар серияси, Буффоннинг кўз ёшлари, шерикларининг ноаниқ зарбалари...

Португалия терма жамоаси 12 йиллик эффектни такрорлаб кутилмаганда Европа чемпиони бўлса кўпчилик мендан хафа бўлмаса керак. Ахир ҳеч ким Евро-1992да Дания, 2004 йил Греция чемпион бўлишини ҳеч ким кутмаганди...орадан 12 йил ўтди

Португалия ёмон жамоа бўлгани учун эмас (таркибда КриРо бўлган жамоа ёмон бўлмайди) гуруҳ босқичида биронта ўйинда юта олмай, Хорватияни қўшимча таймларда урилган битта гол туфайли, Польшани пенальтилар сериясида мағлуб этган жамоа ярим финалда Уэльсни асосий вақтда таслим қила олди. Буни кичик мўжиза деб аташ мумкин.

Ярим финал ҳақида гапирсак, Рицолли - плей-оффнинг энг ёмон ҳаками. Агар Германия мусобақани тарк этиши адолатли бўлгандир, аммо бундай ҳакамлик билан эмас.

Янги асрдаги энг қобилиятли Франция терма жамоасини кўриб турибмиз. Гризманн - Зидан давридан буён энг яхши франциялик футболчи. У Европа чемпионатида 6та гол уриб бўлди, мутлоқ рекордчи Мишель Платини ҳисобида 9та гол бор. У яна финалда еттинчи рақамли футболчи билан тўқнаш келади, улар ЕЧЛ финалида ҳам тўқнаш келишган эди.

Икки кундан кейин Финал!


Нигора Абидова