"Навбаҳор": Ёшларимиз дуранг ўйнашди

Ёшларимиз “Навбаҳор-Умид” футбол мактабининг сунъий қопламали майдонида биринчи лига вакили “УзДонгЖу” жамоаси билан куч синашишди. Гарчи ўйин ўртоқлик мақомига эга бўлсада, ҳар икки жамоа футболчилари ҳам ўзларини кўрсатишга уринишди. Натижа ҳам шунга яраша бўлди. Яъни томонлар 1:1 ҳисоби билан чекланишди. Аввалига андижонликлар ҳисобни очишган бўлса иккинчи бўлимда ёшларимиз ҳисобни тенглаштиришга эришишди. Жавоб тўпига кўрикдан ўтиш учун жалб этилган Фарҳод Шокиров муаллифлик қилди. Аслини олганда Шокиров ҳам “Навбаҳор” футбол клуби тарбияланувчиси саналади. Олдинги мавсумларда асосий таркибга кира олмаган ҳужумчи кейинчалик вилоятимизнинг биринчи лигада қатнашаётган жамоалари шарафини ҳимоя қилишга улгурганди. Хусусан, Шокиров “Динамо” ўйингоҳида ўтказилган “Навбаҳор” ва “Косонсой” жамоалари ўртасидаги ўртоқлик учрашувида косонсойликлар сафида ҳаракат қилганди. Унинг ҳаракатларидан қониқиш ҳосил қилган мураббийлар Фарҳодни ёшлар сафида кўрикдан ўтказишга қарор қилишганди. Дарвоқе, Шокиров айни пайтда ёшларимиз билан ишлаётган Ляннинг шогирди саналади.

Ёшларимизнинг биринчи бўлимдаги таркиби қуйидагича кўринишга эга бўлди: А.Эргашев, Р.Ўринов, Ҳ.Юнусов, О.Ҳалилов, Ш.Сайфиддинов, А.Турғунбоев, С.Теляков, А.Неъматуллаев, Х.Ғаниев, А.Ҳожимирзаев, И.Абдуллаев. Иккинчи бўлимда кўрик учун таклиф этилган бир қатор футболчилар майдонга туширилди.

Шу куни мураббийларимиз машғулотларда қатнашаётган 40 нафарга яқин футболчиларнинг аксариятини синовдан ўтказишди. Кўрикдан ўтиш учун жалб этилган ўйинчиларни қандай имкониятга эга эканликлари борасида тегишлича маълумотларга эга бўлинди. “УзДонгЖу”га қарши учрашувни Зоҳид Нурматов, Мустафо Байрамов ва Сергей Захарецкийлар ҳам кузатиб боришди. Шу сабабли, асосий таркиб машғулотларида қатнашаётган ва “Косонсой” билан ўтган учрашувда қатнашган футболчиларнинг айримлари бу сафар ҳам майдонга тушишди.