"Навбаҳор" Туркияда Қозоғистон клубига мағлуб бўлди

Кескин курашлар остида ўтган учрашувнинг 1-бўлимида чимкентликлар Мирзад Механовичнинг голидан сўнг, ҳисобни очиб, танаффусга 1:0 ҳисобидаги ғалаба билан чиқиб кетишди. Иккинчи бўлимда “Ордабаси” аъзоси Сергей Хижниченко жамоасининг навбатдаги ҳужумини самарали тарзда якунлаб, ҳисобдаги фарқни оширди – 2:0.

Шундан сўнг, ўйинда бурилиш ясаш мақсадида, жамоамиз аъзолари ҳужум суръатини оширишди.Бу эса навбатдаги ҳужум пайтида ўз самарасини бериб, чимкентликлар ўз жарима майдончалари ичида ўйин қоидасини бузишди. Натижада учрашув бош ҳаками “Ордабаси” дарвозасига 11 метрли жарима зарбаси белгилади. Пенальтини захирадан майдонга туширилган Сардор Теляков аниқ амалга ошириб, ҳисобдаги фарқни қисқартирди – 2:1.

“Лочинлар” ўйин сўнггига қадар, мувозанатни тиклашга ҳаракат қилишди. Аммо ҳужумлар ўз якунига етмади. Натижада мазкур учрашувда чимкентликлар 2:1 ҳисобида ғалаба қозонишди.

Таъкидлаш жоизки, ушбу баҳсда жамоамиз мураббийлари футболчиларнинг жисмоний ҳолатларини синовдан ўтказиб олишди.

Шу боис, мазкур мағлубиятдан фожиа ясамаслик керак. Зеро, шундай назорат-синов ўйинлари орқали футболчилар янги мавсум бошлангунига қадар, спорт формаларини секин –аста тиклаб олишади.

Белек шаҳрида бўлиб ўтган мазкур ўйинда “лочинлар” устози Нўъмон Ҳасанов майдонга қуйидаги футболчиларни туширди: Ўткир Юсупов, Азимжон Аҳмедов, Мирзоҳид Ғофуров, Даврон Ҳошимов, Игорь Голбан, Иван Соловьёв, Ислом Исоқжонов, Марко Путинканин, Баҳром Абдураҳимов, Қувондиқ Рўзиев, Забиҳилло Ўринбоев.
Захирадан майдонга тушганлар: Никола Тасич, Аббос Ғуломов, Шерзод Ғуломжонов, Фарҳод Мираҳматов, Сардор Теляков, Шаҳзод Ҳамидов, Илҳом Алибоев, Ҳусайн Эргашбоев.

“Навбаҳор” ПФК матбуот хизмати.

Фото: "Ордабаси" матбуот хизмати

Реклама