Мухтор Қурбонов: "Бу йил энг кўп дурангга биз эришаётган бўлсак керак"

- Бугун учрашув оғир ўтишини кутгандик. Чунки андижонликлар ҳозирги пайтда ҳар бир ўйинда очко учун тушишяпти. Афсуски, ўйин биз кутгандек бўлиб чиқди. Учрашув давомида тўпни ўзимизда назорат қилган бўлсак-да, меҳмонлар ҳам ёмон ҳаракат қилишгани йўқ. Айрим вазиятларда улар қарши ҳужумдан фойдаланиб гол уришлари ҳам мумкин эди. Афсуски, бугун бизга омад кулиб боқмади. Сабаби Зафар Полвоновнинг зарбасидан кейин дарвозага кириб кетаётган тўпга Игорь Таран тегмаганда гол урардик. Нима ҳам қилардик, олдинга қараб юришда давом этамиз. Ҳар доим ҳам ғалаба қозониб бўлмайди. Менимча, бу йил чемпионат энг кўп дурангга биз эришаётган бўлсак керак. Энди кейинги учрашувларда ғалаба қозонишга ҳаракат қиламиз.

- Таран кўплаб вазиятлардан фойдалана олмади. Нега уни алмаштирмадингиз?
- Бизнинг асосий ҳужумкор ўйинчиларимиз бошланғич таркибдан жой олишди. Захира ўриндиғида ўйинимизни кучайтириши мумкин бўлган биргина футболчи Ғулом-Ҳайдар Ғуломов бор эди холос. Аммо у ҳам бир кун олдим бетоб бўлиб қолди. Шу сабабли таваккал қилиб уни майдонга туширгим келмади. Игорь Таранда тажриба барибир катта. Балки гол урар деб кутгандик. Лекин аксига олиб, ҳужумчи кириб кетаётган тўпга ҳалақит қилди.