Мухлислар минбари. Пул футболчини бузадими?

Одил Аҳмедовга кўп жиҳатдан ҳавас қилса арзийди. Айниқса, унинг "Пахтакор"га бўлган садоқатига қойил қолмасдан илож йўқ. Эсингиздами, "Бунёдкор" олий лигага чиқиб, жуда катта пуллар эвазига кўпчиликнинг бошини айлантирган йиллар... 

"Бунёдкор" деярли барча кучли футболчиларни бирин-кетин ўз сафига қўшиб олган, лекин уй, машина ва катта маош каби ваъдаларга қарамай, Одил Аҳмедов барибир "Пахтакор"да қолганди. Чунки садоқат ҳаммасидан устунлик қилган. Бу ҳақда у ўз интервьюсида ҳам айтиб ўтди.

Кейин шундай бўлдики, Аҳмедов чет элда ўйнашга, таъбир жоиз бўлса яхши пул топишга ҳам улгурди. Буларнинг ҳаммасига вақт етди. 

Энди бир ўйлаб кўринг, ҳозир ўзбек футболида вазият ўзгарганми? Ҳозир ҳам Одил Аҳмедовга ўхшаган ўз клубига содиқ футболчилар борми? Ёки пул ҳаммани бузадими? Марҳамат, бу ҳақда фикрингиз бўлса, изоҳда қолдиринг.