“Металлург” ёшлари хотира турнирлари ғолиби

Ўтганларни ёдга олиш, улар амалга ошириб кетган ишларни эслаш жуда яхши одат. Ўзбек футболида ўзига хос из қолдирган, орамиздан вақтли кетган инсонлар оз эмас. Яқинда Бекободда ҳамда Янгиерда шундай тадбирлар ўтказилди. Узоқ йиллар “Металлург”да самарали меҳнат қилган, жамоанинг тикланиши ва кучлилар сафида боришида ўзининг саъйи ҳаракатлари билан муносиб ҳисса қўшиб келган Шамил Толипов хотирасига бағишланган турнир бўлиб ўтди. Унда “Металлург”, “Олмалиқ”, “Бунёдкор” ҳамда “Янгиер” футбол мактаблари тарбияланувчилари баҳс олиб боришди. Ярим финал босқичида пойтахтликлар Янгиер вакилларини, “Металлург” ёшлари эса олмалиқликларни мағлубиятга учратишди. Финал ўйини “Металлург” стадиони уюштирилди ва тезкор, қарама-қарши ҳужумкор тарзда ўтганлиги билан ёдда қолди. Бу ўйинда бекободликлар 2:1 ҳисобида ғалаба қозонишди ва бош совринни уйда олиб қолишди.

Турнинда қатнашган барча жамоа вакиллари эсдалик совғалари, диплом ҳамда мукофотлардан қуруқ қолишмади. Тақдирлаш маросимида “Металлург” футбол клуби раҳбарияти, Шамил Толиповнинг оила аъзолари иштирок этишди. Сўзга чиққанлар Шамил Жўрабоевичнинг ажойиб хислатларини тилга олишди, самимий, олийжаноб инсон бўлганликларини айтиб ўтишди. Мазкур мусобақа анъанавий бўлишига ва ҳар йили “Хотира ҳамда қадрлаш куни” арафасида ўтказидишига келишиб олинди.

Янгиер шаҳрида эса Бахтиёр Давлатов хотирасига бағишлаб ўтказилган турнирда ҳам “Металлург” ёшлари зафар қучишди.

"Металлург" матбуот хизмати